گەورەترین مۆزەخانە لە وڵاتی میسر کرایەوە

ئاڤا نیوز

دوای چەند جارێک دواخستنی کردنەوەی مۆزەخانەکە، وڵاتی میسر گەورەترین مۆزەخانەی وڵاتەکەی لە شاری قاهیرەی پایتەخت کردەوە.

زانیاری بەدەستهاتوو: نزیکەی 80 شاندی وڵاتان بە سەرۆکایەتی پادشا، شازادە و سەرۆکی وڵاتان و حکومەتەکان، بەشدارییان لە ڕێوڕەسمی کردنەوەی مۆزەخانەکەدا کرد.

زانیاریی زیاتر: مۆزەخانەکە دەڕوانێت بەسەر هەڕەمەکانی جیزەدا، ڕووبەرەکەی نزیکەی پێنج سەد هەزار مەتر دووجایە، ماوەی زیاتر لە 20 ساڵە میسر سەرقاڵی دروستکردنییەتی و تێچووەکەی زیاتر لە ملیارێک دۆلار بوو و چاوەڕوان دەکرێت ڕۆژانە 15 هەزار گەشتیار سەردانی بکەن.

ئەوەی پێویستە بیزانیت: گرنگترین پارچەکانی مۆزەخانەکە پاشماوەکانی تووت عەنخ ئامون، فیرعەونی میسرییە کۆنەکانە، کە لە پێنج هەزار پارچە پێکهاتووە و لە چەندین مۆزەخانەی جیاواز لە میسر و جیهاندا هەڵگیرابوون، بەڵام ئێستا لە یەک هۆڵی مۆزەخانە گەورەکەی میسر کۆکراونەتەوە.

ئەمەش بزانە: بەگشتی، مۆزەخانەکە زیاتر لە 100 هەزار پارچە شوێنەوار لەخۆدەگرێت، ئەمەش وای لێدەکات ببێتە گەورەترین مۆزەخانە لە جیهاندا کە تەرخان کرابێت بۆ شارستانیەتی فیرعەونەکان، کە 30 بنەماڵەی پادشایی بە درێژایی پێنج هەزار ساڵ بەخۆوە بینیوە.

بەتەنیشت ئەم بابەتەوە: تەنیا لە نۆ مانگی یەکەمی ئەمساڵدا 15 ملیۆن گەشتیار سەردانی میسریان کردووە، بە بەراورد بەهەمان ماوەی ساڵی ڕابردوو ڕێژەکە 21% زیادیکردووە و داهاتەکەی گەیشتووەتە 12 ملیار و 500 ملیۆن دۆلار بووە.