سەدر ڕەخنە لە نوێنەری سیستانی دەگرێت

ئاڤا نیوز

ڕێبەری ڕەوتی نیشتمانیی شیعە، ڕەخنە لە نوێنەری ئایەتوڵڵا عەلی سیستانی دەگرێت و لێی دەپرسێت "ئایا سەرکەوتنی باشترینەکان لەژێر کاریگەری دەوڵەتی قووڵی گەندەڵیدا مومکینە؟". سەدر دووپاتی دەکاتەوە کە گەندەڵی و چەکی کۆنترۆڵنەکراو گەڕاونەتەوە بۆ ناو وڵات.

چیرۆکی سەرەکی: عەبدولمەهدی کەربەلایی، نوێنەری ئایەتوڵڵا عەلی سیستانی لە گرتەیەکی ڤیدیۆییدا کە لە کەناڵی کەربەلا پەخش کرا، ڕەخنەی لەو کەسانە گرت کە بایکۆتی هەڵبژاردن دەکەن و هانی خەڵکی دا بەشدار هەڵبژاردن بکەن و ڕوونی کردەوە بایکۆتکردن سوودی نییە بۆ ڕێگریکردن لە گەندەڵکاران.

 

بڵاوکراوەی فەرمی: ساڵح محەممەد عێراقی، لە پۆستێکیدا بە ناوی "گلەیی دۆستێک"، لەسەر زاری سەدر گواستوویەتییەوە، "جەنابی شێخ ئەگەر شوێنکەوتووانت دەنگیان بە چاکەکاران بدایە و وازیان لە گەندەڵکاران بهێنایە، ئایا ئەوە بە مانای پێکهێنانی حکومەتێکی چاک دێت؟ ئایا کاریگەری و زاڵبوونی دەوڵەتی قووڵی گەندەڵت لەسەر جومگە و بەشەکانی هەڵبژاردن لەبیر کردووە؟" هەروەها ئەوەشی نووسیوە "سەرکەوتنی چاکەکاران لەژێر ئەو زاڵبوونەدا شتێکی دوورە".

 

لەهەمان کاتدا: دەشڵێ: "تەنانەت ئەگەر چاکەکاران چەند کورسییەکیان بەدەستبهێنایە، ئەوا دواتر ناچار دەبوون هاوپەیمانی لەگەڵ گەندەڵکاران و ڕووخسارە کۆنەکان بکەن بۆ پێکهێنانی حکومەت و دابەشکردنی پشک و دەستکەوتەکان، بەمەش تووشی گەندەڵی دەبوون و لە داهاتوودا نەگونجاو دەبوون."

 

درێژەی پەیامەکەی ساڵح محەممەد عێراقی لەسەر زاری سەدر بۆ نوێنەرەکەی سیستانی:

- ئێمە چاوەڕوانی باشترینمان لێدەکردیت بۆ ڕزگارکردنی عێراق لە چنگی گەندەڵکاران و پاککردنەوەی مەزهەب لە گەندەڵی و فەساد.
- تەنانەت ئەگەر کەناڵەکەش سزای خۆی وەرگرتبێت لەسەر کارە تاکەکەسییەکەی، ئەوا چەکی کۆنترۆڵنەکراو و میلیشیاکان گەڕاونەتەوە بۆ دابەشکردنی دەسەڵات و گەندەڵیش گەڕاوەتەوە و لە جەستەی نیشتماندا دزە دەکات.
- ئێمە هی خودایین و بۆ لای ئەو دەگەڕێینەوە... شێخەکەمان سوپاس، دوا نزای ئێمە ئەوەیە کە ئەم خەم و ناخۆشییە لەسەر ئەم گەلە هەڵبگری.