هۆشداری دەدرێت؛ لە چەند گەڕەکێکی کەرکووک مەترسی دروستبوونی لافاو هەیە

ئاڤا نیوز

بەڕێوەبەرایەتیی ئاوەڕۆی کەرکووک ڕایگەیاند، بەهۆی ئەوەی لە چەند ناوچەیەکی کەرکووک بەشێوەیەکی هەڕەمەکی خانوو دروستکراون و ڕێڕەوەکانی ئاو پڕکراونەتەوە، لە ئەگەری باران بارین مەترسی دروستبوونی لافاو لە چەند شوێنێک دەکرێت.

ڕاگەیێنراوی فەرمی: بەڕێوەبەرایەتیی ئاوەڕۆی کەرکووک ڕایگەیاند، لە هەندێك ناوچە کە پێشتر ڕێڕەوی باراناو بووە و بەشێوەیەکی هەڕەمەکی پڕ کراونەتەوە و بینا و خانووی نیشتەجێبوونی لەسەر دروستکراوە، ئێستا مەترسی هەیە لە ئەگەری باران بارین، لافاو لەو شوێنانە دروستبێت و مەترسی لەسەر ژیانی هاونیشتمانییان هەبێت.

زانیاریی زیاتر: بەڕێوەبەرایەتیی ئاوەڕۆی کەرکووک داوا لە هاونیشتمانییان دەکات لەو شوێنانە دووربکەونەوە کە مەترسی دروستبوونی لافاوی هەیە و پابەندبن بەپاكڕاگرتنی دەرچەی ئاوەڕۆ و فڕێنەدانی پاشماوە بۆ ناو ئاوەڕۆکان.

مەترسییە زانراوەکان: بەپێی بڵاوکراوەکەی بەڕێوەبەرایەتیی ئاوەڕۆی کەرکووک، ئەم گەڕەک و شوێنانە مەترسی دروستبوونی لافاویان لێدەکرێت:

٠ ناوچەكانی شۆراو
٠ گەڕەکی پەنجا عەلی
٠ گەڕەکی سەیادە
٠ ناوچەکانی دەوروبەری ناوەندی شار

زانیاریی پەیامنێر: بەپێی زانییارییەکانی ئارام جەمال، پەیامنێری ئاڤا لە کەرکووک، بۆ کەمکردنەوەی مەترسی لافاو لەو شوێنانە تیمەکانی شارەوانی و ئاوەڕۆی کەرکووک بەم شەوە دەستییان کردووە بە ئامادەکارییەکان و پاککردنەوەی ڕێڕەوەکانی ئاو، ئاوەڕۆ سندووقییەکان و شەقامەکان لە پاشماوەکان.

ئەمەش بزانە: بەڕێوەبەرایەتی گشتیی کەشناسی و بوومەلەرزەزانی هەرێم ڕایگەیاندووە، سبەى شەممە، ئاسمانی هەرێمی کوردستان، بە گشتی هەور و باراناوی دەبێت، لە زۆربەی ناوچەکان باران دەبارێت، لە هەندێک ناوچە دەگۆڕێت بۆ لێزمە باران و هەورە تریشقە هەروەها پێشبینی دەکرێت لە ناوچە شاخاوییە سنوورییەکان بەڕێژەیەکی کەم بەفر ببارێت.