سەرۆک بارزانی سەردانی باکووری کوردستان دەکات

ئاڤا نیوز

 

چوارەم سیمپۆزیۆمی مەلای جەزیری لە شرناخی باكووری كوردستان بەڕێوەدەچێت، ئەمڕۆ دووەم ڕۆژی چالاكییەكە و سەرۆك بارزانیش بەشدار دەبێت و وابڕیارە گوتارێكیش پێشكەش بكات.

 

چیرۆكی سەرەكی: بە سەرپەرشتیی زانكۆی شرناخ چوارەم سیمپۆزیۆمی مەلای جەزیری لە شێرناخی باكووری كوردستان بەڕێوەدەچێت، چالاكییەكە دوو ڕۆژ دەخایێنێت، دوێنێ یەكەم ڕۆژ بوو، وا بڕیارە ئەمڕۆ لە دووەم ڕۆژی سیمپۆزیۆمەكەدا سەرۆك بارزانی بە بانگهێشتێكی فەرمی ئامادە بێت و وتارێكیش پێشكەش بكات.

زانیاریی بەدەستهاتوو: سیمپۆزیۆمی مەلای جەزیری بە هاوئاهەنگی لەگەڵ پارێزگای شرناخ و قایمقایمەتی جزیرێ، بەڕێوەدەچێت، لە ڕۆژی یەکەم نۆ پانێڵ و ڕۆژی دووەمیش هەشت پانێڵی دیکە پێشكەش دەكرێن.

لەو چالاكییەدا زیاتر لە 95 كەسایەتیی و زانا و ئەكادیمیست بەشدارن و زۆینەی پانێڵەکان بە كوردی و بەشێکیشیان بە زمانی فارسی، تورکی، عەرەبی و ئینگلیزی لەلایەن ئەکادیمیست و پسپۆڕەکانەوە پێشکەش دەکرێن.

ئەوەی پێویستە بیزانیت: سیمپۆزیۆمی ئەمجارە لە بارەی دیدگای مەلای جزیرییەوە دەبێت بۆ ئاکار و ڕەوشت، دوای تەواوبوونیشی ناوەڕۆك و گفتوگۆ و گوتارەكانی چالاكییەكە دەكرێت بە كتێبێك و بڵاو دەكرێتەوە.