بەهۆی مەترسیی لافاو لە چەند ناوچەیەک پشووی فەرمی ڕاگەیێنرا

ئاڤا نیوز

 

بەهۆی ئەو شەپۆلەی بەهێزەی بارانبارین کە هەرێمی کوردستانی گرتووەتەوە سبەی چوارشەممە لە پارێزگاکانی سلێمانی و هەڵەبجە، قەزاکانی دووکان، چەمچەماڵ، شارەزوور و پێنجوێن کرایە پشووی فەرمی.

 

وێنە گەورەکە: ماوەی 24 کاتژمێرە شەپۆلێکی تووندی بارانبارین ڕووی لە ناوچە جیاوازەکانی هەرێمی کوردستان کردووە، بەهۆیەوە ئاستی ئاو بەڕێژەیەکی بەرچاو بەرزبووەتەوە و لە قەزای چەمچەماڵیش لافاو دروستبووە و دوو کەس گیانیان لەدەستداوە و منداڵێکی دیکەش لە کەرکووک لافاو بردی و گیانی لەدەست دا، هاوکات دەیان ئۆتۆمبێل و خانوو کەوتوونەتە ژێر ئاو. هاوکات هۆشداری لە دروستبوونی لافاو لە گەرمیان و هەڵەبجە دەکرێت لە چەند کاتژمێری داهاتوودا.

 

ڕاگەیێنراوی فەرمییەکان: نـەبیــــل حمەصـــــالح عـــزیز، بەڕێوەبەری پەروەردەی شارەزوور  ڕاگەیاند: لە پێناو بەرژوەندیی گشتی و سەلامەتی مامۆستایان و فەرمانبەران و منداڵان و قوتابیان و خۆێندکاران سبەی ڕێکەوتی (10-12-2025) دەوام لەسەرجەم ناوەندەکانی خۆێندنی سنوری بەڕێوەبەرێتیمان رابگیرێت و رۆژی دواتر دەوام ئاسایی دەبێتەوە.

 

-قائیمقامیەتی قەزای چەمچەماڵ بڵاوی کردەوە، سبەی چوارشەممە 10/ 12/ 2025 لەسەرجەم دام و دەزگا حکومیەکان و قوتابخانە و خوێندنگەکان و زانکۆ و پەیمانگاکان پشووی فەرمیە، جگە لەو دامودەزگایانەی ئێشکگری بەردەوامیان هەیە.9/ 12 /2025.

 

-سبەینێ چوارشەممە 2025/12/10 لە ناوەندەکانی خوێندنی سنووری پەروەردەی پێنجوێن کرایە پشوو.

 

-بەڕێوەبەری گشی پەروەردەی سلێمانی: لەپێناو سەلامەتی گیانی قوتابیان و خوێندکاران و لەسەر داوا و داخوازی کەسوکاری خوێندکاران، بڕیارماندا سبەی چوارشەممە لەسەرجەم ناوەندەکانی خوێندنی حکومی و ناحکومی سنووری بەڕێوەبەرایەتی گشتی پەروەردەی سلێمانی دەوام ڕابگیرێت. 

-بەڕێوەبەرایەتیی گشتیی پەروەردەی هەڵەبجە ڕایگەیاند، بەپشت بەستن بە پێشبینییەکانى دامەزراوەى کەشناسى و نالەبارىی کەشوهەواى ناوچە جیا جیاکانى کوردستان، لەپێناو پاراستنى سەلامەتى گیانى خوێندکاران و قوتابیان و مامۆستایان، سبەینی چوارشەممە ڕێکەوتی  10/ 12/  2025 لە دیوانی بەڕێوەبەرایەتی پەروەردەی هەڵەبجە و سەرجەم ناوەندەکانی خوێندن  (باخچە و قوتابخانە و خوێندنگاکانی حکومی و ناحکومی) سنوری بەڕێوەبەرایەتی گشتیمان پشووی فەرمییە.