سەرۆکایەتیی کۆماری عێراق: لایەنە فیدڕاڵییەکان دەستبەجێ هەماهەنگی لەگەڵ حکومەتی کوردستان بکەن

ئاڤا نیوز

 

سەرۆکایەتیی کۆماری عێراق ڕایگەیاند، لە نزیکەوە چاودێریی دروستبوونی لافاو لە چەند ناوچەیەکی هەرێمی کوردستان دەکەن و داواشیان لە لایەنە پەیوەندیدارە فیدڕاڵییەکان کردووە دەستبەجێ هەماهەنگی لەگەڵ حکومەتی کوردستان بکەن و هەموو هاوکارییەکی پێویستیان پێشکەش بکەن.

 

چیرۆکی سەرەکی: ئەمڕۆ سێشەممە 9-12-2025، لە سنووری قەزای چەمچەماڵ بارانی بە لێزمە باری و بووە هۆی دروستبوونی لافاو، لە ئەنجامیشدا زیانی گیانی و ماددی لێکەوتەوە.

 

ڕاگەیێنراوی فەرمی: سەرۆکایەتیی کۆماری عێراق لە ڕاگەیێنراوێکدا باس لەوە دەکات، بانگەوازییان ئاڕاستەی لایەنە پەیوەندیدارە فیدڕاڵییەکان کردووە تا دەستبەجێ هەماهەنگی لەگەڵ حکومەتی کوردستان بکەن و پشتیوانیی پێویست لە پرۆسەی گەیاندنی هاوکاریی و پاراستنی هاووڵاتیان پێشکەش بکەن.

 

دەشڵێت، نیگەرانن لەوەی بەهۆی لافاوەوە گیانلەدەستدان و بریندار هەیە و چەندین ماڵیش زیانیان بەرکەوتووە، پرسە و هاوسۆزی خۆیشیان بۆ کەسوکاری قوربانییەکان دەردەبڕن.