سەرۆکوەزیران مەسرور بارزانی بە فەرمی بانگهێشتی ڕووسیا دەکرێت

ئاڤا نیوز

سەرۆکوەزیران مەسرور بارزانی و نوێنەری تایبەتی سەرۆکی ڕووسیا بیروڕایان لەبارەی دوایین پێشهات و گۆڕانکارییەکانی عێراق و ناوچەکە و پەرەپێدانی پەیوەندییەکانی نێوان هەرێمی کوردستان و ڕووسیا ئاڵوگۆڕ کرد.

وێنە گەورەکە: ئەمڕۆ پێنجشەممە 06-02-2025، مەسرور بارزانی، سەرۆکی حکومەتی هەرێمی کوردستان، پێشوازی لە شاندێکی ڕووسیا بە سەرۆکایەتیی میخائیل بەگدانۆڤ، نوێنەری تایبەتیی سەرۆکی ڕووسیا بۆ کاروباری ڕۆژهەڵاتی ناوەڕاست و ئەفریقا و جێگری وەزیری دەرەوەی ئەو وڵاتە کرد.

ڕاگەیێنراوی فەرمی: نووسینگەی سەرۆکوەزیران لە ڕاگەیێنراوێکدا ڕایگەیاند:

- لە دیدارەکەدا نوێنەری تایبەتیی سەرۆکی ڕووسیا و جێگری وەزیری دەرەوە، ئاماژەی بە پێگەی گرنگیی هەرێمی کوردستان و پەیوەندیی دۆستانە و لە مێژینەی وڵاتەکەی لەگەڵ هەرێمی کوردستان کرد.

- جەختی لە گرنگیی بەهێزکردنی پەیوەندییەکان لەگەڵ هەرێمی کوردستان کردەوە.

- نوێنەری تایبەتیی سەرۆکی ڕووسیا بە فەرمی بانگهێشتی سەرۆکی حکومەتی هەرێمی کوردستانی بۆ مۆسکۆ کرد.

- هەر لە دیدارەکەدا سەرۆکوەزیرانی هەرێمی کوردستان، خواستی هەرێمی کوردستانی بۆ برەودان بە پەیوەندیی دوولایەنە دووپات کردەوە.

ئەوەی پێویستە بیزانیت: لە تەوەرێکی دیکەی دیدارەکەدا، جەخت لە گرنگیی چارەسەرکردنی کێشەکانی نێوان هەرێمی کوردستان و حکومەتی فیدراڵ کرا، لەم ڕووەوە هەموارکردنی یاسای بودجەی فیدراڵ و ڕێککەوتن لەسەر هەناردکردنەوەی نەوتی هەرێمی کوردستان بە هەنگاوێکی ئەرێنی لە قەڵەمدرا.

ئەمەش بزانە: بەشێکی دیکەی گفتوگۆکان تایبەت بوو بە دوایین گۆڕانکارییەکانی بارودۆخی سووریا، هەردوولا هاوڕابوون لەسەر پێویستی پاراستنی ئاسایش و ئارامیی و مافەکانی گەلی کورد و گشت پێکهاتەکانی سووریا.