سوودانی دوای کاردانەوەکان پۆزش لەبارەی هەڵەبجە دەهێنێتەوە و پەیامێکی تایبەت دەنێرێت

ئاڤا نیوز

سەرۆکوەزیرانی عێراق لە پەیامی فەرمی حکومەت باسی هەڵەبجەی نەکرد، کەچی دواتر بەهۆی کاردانەوەکان لە پەیامێکی دیکەدا پۆزشی هێنایەوە و کارەساتی هەڵەبجەی بە یەکێک لە قێزەونترین تاوانەکانی جینۆساید ناساند کە لەلایەن ڕژێمی دیکتاتۆری لەناوچوو بە چەکی کیمیاوی ئەنجامدرا.

وێنە گەورەکە: ئەمڕۆ لە عێراق بەبۆنەی کیمیابارانکردنی هەڵەبجە و چوار بۆنەی دیکە پشووی فەرمی بوو، بەڵام  ڕاگەیێنراوەکەی سوودانی بەم بۆنەیەوە تەنانەت بە یەک وشە باسی هەڵەبجەی تێدا نەبوو، لە میدیا و تۆڕەکۆمەڵایەتییەکان لە کوردستان کاردانەوەی لێ کەوتەوە و هێرشی میدیایی تووندی کرایە سەر، بە هەوڵێک بۆ بچووکردنەوەی پرسی هەڵەبجە لێکدرایەوە.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، ئێوارەی ئەمڕۆ یەکشەممە سەرۆکوەزیرانی عێراق بەربانگی لەگەڵ ژمارەیەک لە کەسوکاری شەهیدان و قوربانیانی دەستی ڕژێمی دیکتاتۆری لەناوچوو کردەوە.

بەشێک لە گوتەکانی سەرۆکوەزیرانی عێراق لەگەڵ کەسوکاری شەهیدان:

٠ پێویستە پابەند بین بەو هەڵوێست و بەهایانەی کە شەهیدانمان لە پێناویدا قوربانییان دا.

٠ ئەمڕۆ ساڵیادی کارەساتی هەڵەبجەیە، کە یەکێک لە قێزەونترین تاوانەکانی جینۆسایدی تێدا ڕوویدا و ڕژێمی دیکتاتۆری لەناوچوو بە چەکی کیمیاوی بۆردومانی کرد.

٠ ڕۆڵی تیمە تەکنیکییە تایبەتمەندەکان لەگەڕان بەدوای گۆڕە بەکۆمەڵەکان و گرنگی هەڵدانەوەیان و دەرکردنی ڕوفاتی قوربانییەکان بەرز دەنرخێنین.