سوودانی: هێرشەکەی سەر هەولێر پەیوەندییەکانی نێوان عێراق و ئێران پەک دەخات

ئاڤا دیجیتاڵ

 

سەرۆکوەزیرانی عێراق سەبارەت بە هێرشەکانی شەوی ڕابردووی سەر هەولێر ڕایگەیاند، هێرشەکانی سەر هەولێر دووژمنکارانە بوون، پەیوەندیی بەهێزی نێوان عێراق و ئێران تێکدەدات. 

 

چیرۆکی سەرەکی: درەنگانی شەوی ڕابردوو ئێران بە مووشەک هەولێری بۆردوومان کرد، بەهۆیەوە پێنج کەس گیانیان لەدەستدا و 6 کەسی دیکەش بەسەختی برینداربوون، ئێران ڕاستەوخۆ بەرپرسیارێتیی هێرشەکەی لەئەستۆ گرت. 

 

لێدوانی فەرمی: هێرشەکەی ئێران بۆ سەر هەولێر کردەوەیەکی دووژمنکارانەیە و دەستدرێژیی بوو بۆ سەر عێراق، هێرشەکە ناوچەیەکی نیشتەجێبوونی کردووەتە ئامانج و قوربانییەکانیش خێزانێکی کوردی عێراقی بوون، لەنێویاندا منداڵیشی تێدابوو. محەممەد شیاع سوودانی، سەرۆکوەزیرانی عێراق ئەمەی بە ئاژانسی بلومبێرگ ڕاگەیاند.

 

زانیاریی زیاتر: بەدڵنیاییەوە ئەم کارە پێشهاتێکی مەترسیدارە، پەیوەندیی بەهێزی نێوان عێراق و ئێران تێک دەدات، حکومەتی عێراقیش مافی گرتنەبەری هەموو ڕێوشوێنە دیپلۆماسی و یاساییەکانی هەیە.

 

باکگراوند: نزیک کاتژمێر 11:30ـی خولەکی شەوی دووشەممە، 15-01-2024، سوپای پاسدارانی ئێران بە 24 مووشەکی بالیستیک چەند ناوچەیەکی سڤیلنشینی هەولێری بۆردوومان کرد، بەهۆیەوە پێنج  کەس گیانیان لەدەستدا، شەش کەسی دیکەش برینداربوون.