هێرشەكەی سەر هەولێر لەگەڵ یەكێتی ئەوروپا تاوتوێ دەكرێت

ئاڤا دیجیتاڵ

ئەمرۆ چوارشەممە 17-01-2024 لە برۆكسێلی پایتەختی بەلجیكا، یەكەمین كۆبوونەوەی لیژنەی یەكێتیی ئەوروپا و عێراق بۆ هاوكاری و گەشەپێدان بە ئامادەبوونی شاندی عێراق و هەرێمی كوردستان، بەرێوە دەچێت. 

زانیاریی زیاتر: دكتۆر ماهر یۆهان، بریكاری وەزیری پلاندانانی عێراقی و ئەحمەد بەرواری، باڵیۆزی عێراق و شاندی یاوەریان ئامادەی كۆبوونەوەكە دەبن، هاوكات سیروان محەممەد، بڕیكاری وەزیری پلاندانانی هەرێمی كوردستان و د. دلاوەر خالد ئاژگەیی، نوێنەری حكومەتی هەرێمی كوردستان لە یەكێتیی ئەوروپا بەشداری كۆبوونەوەكە دەكەن.

لێدوانی فەرمی:  یەكێتیی ئەوروپا و عێراق، ڕێكەوتنێكی هاوكاری و هاوبەشیان لە نێوان خۆیان واژۆ كردووە، بۆ ڕاپەراندنی كارەكان چەندین كۆمیتەی هاوبەش لە نێوان هەردوولا پێكهێنراون و حكومەتی هەرێمی كوردستان بەفەرمی بەشداری لە كۆبوونەوەكان دەكات و نوێنەری تایبەتی خۆی هەیە، د. دلاوەر خالد ئاژگەیی، نوێنەری حكومەتی هەرێمی كوردستان لە یەكێتیی ئەوروپا وای بە ئاڤا میدیا گوت.

ئەوەی گرنگە: بابەتی سەرەكیی كۆبوونەوەكان، پرسەكانی سیاسی، ئابووری، سیستەمی بانكی، شەفایەت، پرسی گەنجان، پەرەپێدان بە كەرتی تایبەت و پرسی كەشوهەوا و لێكەوتەكانی دەبن.