ئەو دوو ئەفسەرە عێراقیەی گرتە ڤیدیۆییەكەیان بڵاوبووەوە سزادران

ئاڤا دیجیتاڵ

دوێنێ لەگرتەیەكی ڤیدیۆییدا، دوو ئەفسەری سووپای عێراق دەردەكەون، یەكێكیان كە پلەی موقەدەمە لە ئەفسەرەكەی دیكە دەدات كە پلەكەی عەقیدە و لەو بەرزترە، ئەمەش لەنێو سۆشیال میدیا و میدیاكاندا دەنگدانەوەی هەبوو.

چیرۆكی سەرەكیی: بەپێی بڕیارێكی دادگای سەربازی یەكەم، لە سووپای عێراق، هەردوو ئەفسەرەكە جگە لەوەی سزای هەشت مانگ و چوار مانگ دراون واتە هەردووكیان بەساڵێك سزادراون لە سووپاش دەركراون.

لێدوانی فەرمیی: وەزارەتی بەرگری عێراق لەڕاگەیێندراوێكدا دەڵێت " لە تۆڕە كۆمەڵایەتیەكان گرتەیەكی ڤیدیۆیی بڵاوبووەتەوە كە دوو ئەفسەر بەشێوەیەكی نەشیاو دەردەكەون و لەگەڵ پلە سەربازیەكەیاندا ناگونجێت و پێچەوانەی ڕێكارە سەربازیەكانی سوپای عێراقە كە دەزگایەكی گەورەیە و 103 ساڵە قوربانی دەدات".

بەپێی ڕاگەیێندراوەكە " لەسەر بنەمای ئەو كردەوەیە كە لەگەڵ نێوبانگی سووپا یەكناگرێتەوە، سابت محەمەد بەڕێوەبەری هەواڵگری سەربازی بڕیاریدا بە ڕاگرتنی سەربازەكان و لیژنەی لێكۆڵینەوەی لەسەر پێكهێناون".

لەلایەكی دیكەوە: ئەمڕۆ دادگای سەربازی یەكەمی سووپای عێراق بڕیاریدا بە بەندكردنی هەردوو ئەفسەرەكە یەكێكیان بۆ هەشت مانگ و ئەوی دیكەشیان بۆ چوار مانگ، پاشانیش بڕیاری دەركردنیدان لەسووپای عێراق.