هێمن هەورامی: پارتی بە زیادبوونی 400 هەزار دەنگ وەڵامی نەیارەکانی دایەوە

ئاڤا نیوز

هێمن هەورامی تیشک دەخاتە سەر گوشارەکان بۆ سەر هەرێمی کوردستان و دەڵێت: لە ماوەی چوار ساڵدا زیاتر لە 150 جار بە درۆن و مووشەک ‌هێرش کرایە سەر هەرێمی کوردستان، سەرەڕای بڕینی مووچە و بودجەی کوردستان، بەڵام "لایەنگرانمان بە زیاتر لە 400 هەزار دەنگ"، وەڵامی نەیارانی دایەوە.

چیرۆکی سەرەکی: دوای ڕاگەیاندنی ئەنجامی بەرایی خولی شەشەمی پەرلەمانی عێراق لەلایەن کۆمیسیۆنی باڵای هەڵبژاردنەکانی عێراق، هێمن هەورامی، ئەندامی مەکتەبی سیاسی پارتی میوانی گفتوگۆی ڕۆژان بوو و وەڵامی چەند پرسێکی گرنگ سەبارەت بە هەڵبژاردن و زیادبوونی دەنگدەکانی پارتی لەم هەڵبژاردنە دایەوە.

لێدوانی فەرمی: هێمن هەورامی ڕایگەیاند، ئەگەرچی هەرێمی کوردستان، لە ناویشیدا پارتی دیموکراتی کوردستان لە ماوەی چوار ساڵی ڕابردوودا گوشارێکی زۆری لە دژی کرا، بەڵام وەڵامی "نەیارەکانمان بە زیاتر لە 400 هەزار دەنگ درایەوە".

هەورامی ڕوونی دەکاتەوە، ئەم گوشارانەی عێراق بە تایبەت لەسەر کابینەی نۆیەم و خودی مەسرور بارزانی و پارتی بوون، بە بۆچوونی ئەوان بەهۆی ئەم گوشارانەوە خەڵک لە دژی پارتی ڕادەپەڕێت و پارتی لاواز دەکات، بەڵام پێچەوانەکەی دەرچوو و پارتی دەنگەکانی زیادی کرد. 

ئاماژە بەوەش دەکات، لەوەتەی عێراق دروست بووە تاوەکو ئێستا هیچ جووڵەیەکی سیاسی یان حیزبیکی سیاسی  نەیتوانیوە یەک ملیۆن دەنگ تێپەڕێنێت.

لەلایەکی دیکەوە: ئەو ئەندامەی مەکتەبی سیاسی پارتی باسی لەوەشکرد: زیاتر لە 15 بۆ 14 بڕیاری دادگای فیدراڵی لە دژی هەرێمی کوردستان و دژ بە پارتی دیموکراتی کوردستان دراوە.

- هاوکات بڕینی بەشە بودجە و مووچەی خەڵکی هەرێمی کوردستان یەکێکی دیکە بووە لە گوشارەکان بۆ سەر هەرێمی کوردستان و خودی پارتی.