هەسەدە: هێزەکانی سەر بە دیمەشق لە ڕەققە هێرشیانکردەسەرمان

ئاڤا نیوز

هێزەکانی سووریای دیموکرات (هەسەدە) ڕایگەیاند، ئەمڕۆ شەممە لە دەورووبەری ڕۆژهەڵات ڕەققە لەلایەن گرووپێکی سەر بە حکومەتی دیمەشقەوە هێزەکانیان بە ئامانج گیراون و ئەوانیش وەڵامیان داونەتەوە، داواش لە سەرپەرشتیاریی ئەو گرووپانە دەکات بۆ پاراستنی ئارامی ناوچەکە هێرشەکان ڕابگرن.

ڕاگەیێنراوی فەرمی: ناوەندی ڕاگەیاندنی هەسەدە بڵاویکردەوە، "لە هەنگاوێکدا کە دەرخەری دۆخی پشێویی و تێکدارانەیە و لەلایەن چەند گرووپێکی چەکداریی سەر بە حکومەتی دیمەشقەوە پەیڕەو دەکرێت، هێزەکانمان لە میحوەری گوندی غانم علی لە دەوروبەری ڕۆژهەڵاتی ڕەققە ڕووبەڕووی هێرش بوونەوە، لەهێرشەکەشدا گرووپە چەکدارەکان درۆنی بۆمبڕێژکراو و چەکی قورسیان بەکارهێنا، بەبێ ڕەچاوکردنی گیانی خەڵکی مەدەنی و ئاسایشی ناوچەکە".

ئەوەشی خستووەتەڕوو، هەسەدە بەوپەڕی بەرپرسیاریەتییەوە وەڵامی هێرشەکەی داوەتەوە و لە ئەنجامیشدا سێ ئەندامی هێزەکانیان و ژمارەیەکی ئەندامی هێزە هێرشکارەکەش برینداربوون، هێرشەکەش ڕەفتارێکی نابەرپرسانەیە و ئاماژەی ئەوەیە ئەو لایەنانە دەیانەوێت ناوچەکە بەرەو گرژی و شەڕ ڕابکێشن، لە بەرامبەریشدا هەسەدە ئەوپەڕی دانبەخۆدا گرتن پەیڕەو دەکات بەڵام لەبەرامبەر هێرشەکان دەستەوستان نابێت و وەڵامی هەڕەشەکان دەداتەوە.

هەسەدە داواش لە خاوەن و سەرپەرشتیاری گرووپەکان دەکات هێرش و کارە نابەرپرسیارییەکان ڕابگرن، چونکە هەڕەشەی ڕاستەوخۆ بۆ سەر ئاسایش و سەقامگیری لە سەرتاسەری ناوچەکەدا دروست دەکات.