ئێران وەڵامی ئاژانسی وزەی ئەتۆم دەداتەوە

ئاڤا نیوز

تاران هۆشداریی دایە ئەمریکا و وڵاتانی ئەوروپی لەبارەی پێشکەشکردنی پڕۆژە بڕیارێکی نوێ لە ئەنجوومەنی  ئاژانسی نێودەوڵەتیی وزەی ئەتۆم.  

چیرۆکی سەرەکی: بڕیارە لە کۆبوونەوەی داهاتووی ئەنجوومەنی ئاژانسی نێودەوڵەتیی وزەی ئەتۆمی لە ڤیەننا، پرۆژە بڕیارێکی وڵاتانی ڕۆژئاوا تاوتوێ بکرێت، ئامانجی پڕۆژەکە زیادکردنی فشارە لەسەر پرۆگرامە ناوکییەکەی ئێران، ئەم پڕۆژە بڕیارە داوا لە ئێران دەکات پابەند بێت بە بڕیارە نێودەوڵەتییەکان و هەموو چالاکییەکانی پیتاندن ڕابگرێت و زانیاریی پێویست بە ئاژانسەکە بدات. 

لێدوانی فەرمی: ڕەزا نەجەفی، نوێنەری هەمیشەیی ئێران لە ئاژانسی نێودەوڵەتیی وزەی ئەتۆم، ڕایگەیاندووە، ئەو وڵاتانە بەردەوامن لە خراپ بەکارهێنانی میکانیزمە نێودەوڵەتییەکان بۆ سەپاندنی بۆچوونە لووتبەرزەکانیان بەسەر گەلی ئێراندا و هەوڵدەدەن لە ڕێگەی بەکارهێنانی زۆرینەی ژمارەیی خۆیان بسەپێنن.

لەهەمان کاتدا: نەجەفی جەختی لەوە کردەوە کە ئێران "مافی وەرگرتنی وەڵامی گونجاوی هەیە بەرامبەر هەر هەنگاوێکی نایاسایی یان بێ پاساو کە لەلایەن ئەوانەوە بێت."

باكگراوند: تاران لە مانگی تەممووزدا هاوکارییەکانی لەگەڵ ئاژانسەکە ڕاگرت ئەمەش دوای جەنگێکی 12 ڕۆژەی لەگەڵ ئیسرائیلدا، کە بەشێکی زۆری  بنکە ئەتۆمییەکانی وێران بوو، ئاژانسەکە داوای لە ئێران کردووە، ڕێگەی پێبدات بە زووترین کات پشکنینی کۆگاکانی یۆرانیۆمی پیتێنراو بکات، بەتایبەتی ئەوەی بە پلەی بەرز پیتێنراوە، ئێرانیش ڕەتیدەکاتەوە.