شاندێکی تەکنیکی و یاسایی مەکتەبی هەڵبژاردنی پارتی لە بەغدان

ئاڤا نیوز

بۆ بەداچوونی چەند پرسێکی پەیوەست بە ئەنجامی هەڵبژاردنەکانی پەرلەمانی عێراق، شاندێکی تەکنیکی و یاسایی مەکتەبی هەڵبژاردنی پارتی دیموکراتی کوردستان چوونەتە بەغدا و لەگەڵ کۆمیسیۆنی باڵای سەربەخۆی هەڵبژاردنی عێراق کۆدەبنەوە.

وێنە گەورەکە: پێنج ڕۆژە هەڵبژاردنی پەرلەمانی عێراق ئەنجام دراوە، کۆمسیۆن ڕایگەیاندووە، ئەمڕۆ یان سبەی ئەنجامی کۆتایی واتا 100% ڕادەگەیێنرێت.

لێدوانی فەرمی: ئەندامێکی مەکتەبی هەڵبژاردنی پارتی کە ئەندامی شاندەکەیە بە ئاڤا میدیای ڕاگەیاند، شاندەکە بە سەرۆکایەتیی دکتۆر جەعفەر ئیمینکی، بەرپرسی بەشی هەڵبژاردنی پارتییە. ئێستا لە بەغدان. ئامانج لە چوونی ئەو شاندە بەدواداچوون بۆ ئەنجامەکانی هەڵبژاردنی خولی شەشەمی پەرلەمانی عێراق لە تەواوی ئەو بازنانەی کە پارتی تێیاندا بەشدارە، هەروەها بەدواداچوون بۆ ئەو وێستگانە دەکەن کە پارتی دەنگی تێیاندا هێناوە. لێکۆڵینەوە و بەدواداچوون بۆ ئەو وێستگانەش دەکەن کە تا ئیستا کۆمسیۆن ئەنجامەکانی ئاشکرا نەکردووە. 

ئەو ئەندامەی مەکتەبی هەڵبژاردن دەشڵێت: هێشتا کورسیی دەیەمی پارتی لە هەولێر یەکلانەبووەتەوە و لەنێوان پارتی و یەکێتیدایە.

ئەوەی پێویستە بیزانیت: سەبارەت بە کورسی دەیەمی پارتی لە هەولێر، مەکتەبی هەڵبژاردنی پارتی  دەڵێت: ئەو کورسییە مافی یاسایی خۆمانە و لەگەڵ هەژمارکردنی دەنگی ئەو حەوت وێستگەیەی کە لە هەولێر ماوە، بەشی زۆری دەنگەکان کە زیاتر لە هەزار و 500 دەنگە بۆ پارتین و کورسییەکەش بەو وێستگانە یەکلادەبنەوە کە پارتی پێویستی بە زیاتر لە 600  دەنگ هەیە.