گفتوگۆکانی نێوان ئەمریکا و ئیسرائیل سەبارەت بە غەززە گەیشتوونەتە بنبەست

ئاڤا نیوز

بەگوێرەی ڕاپۆرتی میدیاکانی ئیسرائیل دانوستانەکانی نێوان تەلئەبیب و واشنتن سەبارەت بە کەرتی غەززە گەیشتوونەتە بنبەست.

زانیاریی بەدەستهاتوو: کەناڵی 13ــی ئیسرائیلی ڕایگەیاندووە، ئەمریکییەکان توانای پێکهێنانی هێزێکی دەرەکییان نییە تا لە غەززە بێت و چەکداماڵینی حەماس بگرێتە ئەستۆ، بۆیە بەدوای چارەسەری کاتیدا دەگەڕێن و ئەمەش بۆ ئیسرائیل قبووڵ ناکرێت.

زانیاریی زیاتر: حکومەتی ئەمریکا گوشارەکانی بۆ جێبەجێکردنی قۆناغی دووەمی ڕێککەوتنی ئاگربەستی غەززە زیاتر کردووە، بەڵام ئیسرائیل ئامادەیی تێدا نییە و دەڵێت ئاوەدانکردنەوەی غەززە دەبێت بخرێتە دوای چەکدانانی حەماس.

لەلایەکی دیکەوە: هۆکارێکی دیکەی دواکەوتنی چوونە ناو قۆناغی دووەم، قەیرانی گەمارۆدراوەکانی حەماسە لە شاری ڕەفەح، کە تا ئێستاش نزیکەی 100 کەسیان لە تونێلەکانی ژێر زەویدان لە ناوچەکانی ڕەفەح کە لەژێر کۆنترۆڵی ئیسرائیلدایە و لەوێ گیریان خواردووە و ئیسرائیل ڕێگە نادات ئەو کەسانە بەبێ ڕاگەیاندنی تەسلیمبوونیان و ڕادەستکردنی چەکەکانیان بچنە دەرەوە و هاوکات حەماس داوای گواستنەوەیان بۆ ناوچەکانی دەرەوەی کۆنترۆڵی ئیسرائیل دەکات.