وەزیری بەرگریی تورکیا: لێکۆڵینەوە لە سندووقی ڕەشی فڕۆکە تێکشکاوەکە دوو مانگ دەخایەنێت

ئاڤا نیوز 

یەشار گولەر ئاماژە بەوە دەدات لێکۆڵینەوەکان بەردەوامن لەبارەی هۆکاری تێکشکان و کەوتنەخوارەوەی فڕۆکە بارهەڵگرە سەربازییەکەی تورکیا لە جۆرجیا و دەڵێت: بەپێی سەرەداوەکان وا دەردەکەوێت، سەرەتا کلکی فڕۆکەکە بپچڕێت و دواتر فڕۆکەکە ببێتە سێ پارچە. سندووقە ڕەشەکە ڕاستییەکان دەردەخات.

چیرۆکی سەرەکی: هێشتا لێکۆڵینەوەکان بەردەوامن لەبارەی ئەو فڕۆکەیەی لە 11-11-2025 لە کاتی گەڕانەوەیدا بۆ تورکیا لە ئاسمانی جۆرجیا تێک شکا و بەم هۆیەوە سەرجەم 20 سەربازەکەی ناوی گیانیان لەدەستدا.

لێدوانی فەرمی: یەشار گولەر، وەزیری بەرگریی تورکیا سەرنج دەخاتە سەر ئەوەی بەپێی سەرەداوە بەراییەکان پێدەچێت ڕووداوەکە زۆر بە خێرایی لە چەند چرکەیەکدا ڕوویدابێت و دەڵێت: دوایین پەیوەندی بێتێل لەگەڵ تیمی فڕۆکەوانیی فڕۆکەکە کاتژمێر 13:50 بووە. پارچەکانی فڕۆکەکە هێنراونەتەوە تورکیا و لێکۆڵینەوەیان لێ دەکرێت کە هۆکاری ڕووداوەکە بۆ تێکچوونی بزوێنەرەکەی دەگەڕێتەوە.

بە تەنیشت ئەم بابەتەوە: یەشار گولەر ئاماژە بەوە دەدات لەوانەیە یەکێک بۆ زیاتر لە چوار بزوێنەرەکەی فڕۆکەکە پەکیان کەوتبێت و دەڵێت: لەوانەیە پەروانەکان بە هۆی ئەم پەککەوتنە پچڕابن و زیان بە تەواوی پێکهاتەکەی فڕۆکەکە گەیشتبێت. لەوەش دەکۆڵینەوە کە فڕۆکەکە نزیکەی 60 تۆن باری هەڵگرتووە.  

ئەوەی پێویستە بیزانیت: گولەر سەرنجی خستە سەر ئەوەی لە 1957ەوە ئەم فڕۆکەیە بەکار دەهێنرێت کە لە جۆری سی-130ین و دەڵێت: لە 1999 جارێک ئاگر لە بزووێنەرەی ئەم فڕۆکەیە کەوتەوە و دواتر بە سەلامەتی نیشتەوە. بە گشتی فڕۆکەیەکی سەلامەت بووە.

لەلایەکی دیکەوە: ئەم فڕۆکەیەی کەوتە خوارەوە 68 ساڵە بەکار دەهێنرێت و دوای ئەوەی سعوودیە بڕیاری دا چیتر بەکاری نەهێنێت، تورکیا لەگەڵ پێنج فڕۆکەی دیکە 13 ساڵ لەمەوبەر بە دەستی دوو لە سعوودیەی کڕیەوە.