بەرگریی سووریا: هەسەدە هێرشی کردووەتە سەرمان و ژمارەیەک سەربازمان کوژران و بریندار بوون

ئاڤا نیوز

وەزارەتی بەرگریی سووریا ڕایدەگەیێنێت، بەرەبەیانی ئەمڕۆ پێنجشەممە، هێزەکانی سووریای دیموکرات 'هەسەدە' هێرشیان کردووەتە سەر خاڵەکانی بڵاوبوونەوەی سوپای سووریا لە ناوچەی مەعدان لە گوندەواری ڕەققە. بەهۆی ئەم هێرشەوە کە بە چەکی جۆراوجۆر کراوە، دوو سەرباز گیانیان لەدەستداوە و چەندین کەسی دیکەش برینداربوون.

وێنە گەورەکە: سەرەڕای ئاگربەست لە نێوان هێزەکانی سەر بە حکومەتی سووریا و هێزەکانی هەسەدە، بەڵام لە ئاستی مەیدانیدا بەشێوەی ڕۆژانە گرژیی و پێکدادان دروست دەبێت، هەردوولاش یەکتریی بە پێشێلکردنی ئاگربەست تۆمەتبار دەکەن.

ڕاگەیێنراوی فەرمی: بەگوێرەی ڕاگەیێنراوی وەزارەتی بەرگریی سووریا، هێزەکانیان وەڵامی سەرچاوەکانی تەقەکردنەکەیان داوەتەوە و هێرشێکی پێچەوانەی ڕاستەوخۆیان ئەنجام داوە، کە بووە هۆی کۆنترۆڵکردنەوەی ئەو شوێنانە و دەرکردنی هێزە هێرشکارەکان.

لە هەمان کاتدا: وەزارەتی بەرگریی سووریا ڕایگەیاندووە: "ئێمە هەسەدە بە بەرپرسیار دەزانین لە لێکەوتەکانی ئەم دەستدرێژییە ناپاکانە و نوێبووەوەیە، کە بە شێوەیەکی ڕۆژانە دژی خاڵەکانی سوپای سووریا ئەنجام دەدرێت".

لەلایەکی دیکەوە: هێزەکانی سووریای دیموکرات (هەسەدە) لە ڕاگەیێنراوێکدا ئاشکرای دەکات، ئێوارەی دوێنێ چوارشەممە لە میحوەری گوندی غانم عەلی لە دەوروبەری ڕۆژهەڵاتی پارێزگای ڕەققە، هێزەکانیان دوو درۆنیان تێکشکاندووە کە لە خاڵێکی سەربازی سەر بە گرووپە چەکدارییەکانی سەر بە دیمەشق هەڵدرابوون، دوای لێکۆڵینەوەی وردیش بۆیان دەرکەوت هێرشەکە لەلایەن ژمارەیەک چەکداریی بیانییەوە کراوە کە پەیوەندییان بە داعشەوە هەیە و لەو خاڵە سەربازییانە هێرشەکان دەکەن کە گرووپەکانی دیمەشق بەرامبەر هەسەدە دایانناوە.