ئێران یاسایەک بۆ ئەو پیاوانەی لە هاوسەرەکانیان جیا دەبنەوە دەردەکات

ئاڤا نیوز

هەر پیاوێک لە ئێران لە هاوسەرەکەی جیابێتەوە، بەڵام توانای دانەوەی مارەیی نەبێت ئەوا چیتر زیندانی ناکرێت، لەبری ئەوە پاوانە یان کەلەبچەیەکی ئەلیکترۆنی لە قاچی دەبەسترێت بۆ ئەوەی جووڵەكانی كۆنترۆڵ بكرێ و نەچنە دەرەوەی وڵات.

چیرۆکی سەرەکی: داتای جیابوونەوەی هاوسەران لە ئێران لە بەرزبوونەوەدایە، زۆرینەی ژنانی ئێران دوای جیابوونەوە ڕاستەوخۆ داوای مارەیی دەکەن، ئەمەش باری سەرشانی پیاوانی قورس كردووە تا دەگاتە ئەوەی توانای دانەوەی مارەییان نییە، دادگا سزای زیندانی بەسەریاندا دەسەپێنێت تا کاتی دانەوەی مارەیی ژنەکەی، بەڵام لە پەرلەمان بڕیاردرا گۆڕانکاری لەم یاسایە بکرێت.

لێدوانی فەرمی: ئەمین حوسێن ڕەحیمی، وەزیری دادی ئێران ڕایگەیاند: بەپێی ڕەشنووسی نوێی هەموارکردنی یاسای سزادانی دارایی، بەکارهێنانی پاوانە یاخود کەلەبچەی ئەلیکترۆنی لە دۆسیەکانی مارەییدا بەکاردێت، مەبەست لەم گۆڕانکارییە ئەوەیە کە ئەو پیاوانەی توانای دانەوەی مارەیییان نییە، نەخرێنە زیندانەوە و بەردەوام بن لە کار و ژیانی خۆیان تا ئەو کاتەی مارەییەکە دەدەن هەروەها نەتوانن بڕۆنە دەرەوەی وڵات و لە دانەوەی مارەییەکە هەڵبێن.

ئەمەش بزانە: پێشتر مارەیی 110 لیرە بوو بەپێی یاسا و داواکاریی خانەوادەی کچەکان، بەڵام لە هەمواری نوێدا ئەمەش دەگۆڕێت بۆ 14 لیرە واتە لەو بڕە زیاتر نابێت داوا بکرێت و لە دادگا لەسەر ئەو 14 لیرەیە هاوسەران مارە دەکرێن.

ئەوەی پێویستە بیزانیت: لە ئێران لە بری لیرە "سکە"ـی ئاڵتون بەکاردێت کە هەر سکەیەک دەکاتە زیاتر لە مسقاڵیک، هەروەها ئەم گۆڕانکارییە گەورەیە دەتوانێت کۆتایی بە هەزاران دۆسیەی مارەیی بهێنێت کە بوونەتە هۆی زیندانی پیاوان و یەکێک لە هۆکارە سەرەکییەکانی ئەم چاکسازییە، واقیعێکی کۆمەڵایەتییە کە ساڵانێکە لەو وڵاتەدا بەدی دەکرێت؛ زۆرێک لە پیاوان تەنها بەهۆی بێتوانایی داراییەوە زیندانی کراون هاوکات زۆرجار مارەیی بەرز بەبێ ڕەچاوکردنی بارودۆخی ئابووریی لایەنەکان دادەنرێت و دەبێتە هۆی کێشەی گەروەی کۆمەڵایەتی و تەنانەت لە هەندێک ساڵدا مارەیی وەک دووەم هۆکاری سەرەکی زیندانیکردن لەو وڵاتەدا ناسێندراوە.