کۆمیسیۆنە پەرلەمانییەکەی تورکیا بڕیاری دا بەبێ جەهەپە سەردانی ئیمراڵی بکات

ئاڤا نیوز

كۆمیسیۆنی پەرلەمانی توركیا بە زۆرینەی دەنگی ئەندامانی، بڕیاری سەردانیكردنی ئیمراڵی دا. جەهەپە وەك تاكە پارتی توركیا ئامادە نەبوو ئەندامیان لەو لیژنەیە بێت کە سەردانی ئیمراڵی دەکات.

چیرۆكی سەرەكی: ئەمڕۆ هەینی، هەژدەیەمین کۆبوونەوەی کۆمیسیۆنی 'یەکڕیزیی نیشتمانی، برایەتی و دیموکراسی' لە پەرلەمانی تورکیا بەڕێوەچوو، لە كۆی 51 ئەندامی كۆمیسیۆنەكە، بە 32 دەنگی بەڵێ بەرامبەر دوو دەنگی نەخێر، بڕیاری سەردانیكردنی ئۆجەلانی دا لە دوورگەی ئیمراڵی، دوو ئەندامیش دەنگیان نەدا.

لێدوانی فەرمی: موڕاد ئەمین، جێگری سەرۆكی فراكسیۆنی جەهەپە لە پەرلەمانی توركیا، لە لێدوانێكی ڕۆژنامەوانیدا ڕایگەیاند، پارتەكەی بڕیاری داوە، نوێنەری خۆی بەشداریی ئەو لیژنەیە نەکات کە سەردانی ئیمراڵی دەکات.

باکگراوند: ڕۆژی پێنجشەممە ئاكپارتی، پارتی دەسەڵاتداری توركیا، هاوشێوەی ئەندامانی دەم پارتی و مەهەپە، بە بەڵێ دەنگی دا بۆ پێكهێنانی شاندێك لە كۆمیسیۆنەكەی پەرلەمان بەمەبەستی سەردانیكردنی ئۆجەلان لە دوورگەی ئیمراڵی و بەشداریكردنی نوێنەری ئەو حیزبە لە كۆمیسیۆنەكە، بەڵام پارتی جەهەپە، دووەم گەورەترین پارتی توركیا و گەورەترین لایەنی ئۆپۆزسیۆنی ئەو وڵاتە، بڕیاری بەشداریكردنی ئەندامی فراكسیۆنەكەیان، بۆ ئەمڕۆ هەینی دواخستبوو.