مالیکی گەیشتە هەولێر و لەگەڵ سەرۆک بارزانی کۆدەبێتەوە

ئاڤا نیوز

 

سەرۆکی هاوپەیمانیی دەوڵەتی یاسا گەیشتە شاری هەولێر و لەگەڵ سەرۆک بارزانی تاوتوێی پرسی پێکهێنانی حکومەت و دیاریکردنی سەرۆکوەزیرانی داهاتووی عێراق دەکەن.

 

وێنە گەورەکە: دوای ڕاگەیاندنی ئەنجامی هەڵبژاردنی عێراق لەلایەن کۆمیسیۆنەوە، پارتی وەک هێزێکی سەرەکی و کاریگەر لە عێراق زۆرترین دەنگی بەدەستتهێنا، بۆ پێکهێنانی حکومەتی داهاتوو، لایەنەکانی دیکە سەردانی دەکەن.

 

چیرۆکی سەرەکی: پێش نیوەڕۆی ئەمڕۆ شەممە 2025-11-22، نووری مالیکی، سەرۆکی هاوپەیمانییی دەوڵەتی یاسا و شاندی یاوەری گەیشتنە هەولێر و لەلایەن د.فوئاد حوسێن، جێگری سەرۆکوەزیران و وەزیری دەرەوەی عێراق پێشوازیی لێکرا.

 

زانیاریی بەدەستهاتوو: بەگوێرەی زانیارییەکانی ئاڤا نووری مالیکی، سەرۆکی هاوپەیمانیی دەوڵەتی یاسا بۆ کۆبوونەوە لەگەڵ سەرۆک بارزانی دەچێتە پیرمام بۆ گوێگرتن لە ئامۆژگارییەکانی سەرۆک بارزانی لەبارەی دیاریکردنی سەرۆکوەزیرانی نوێ و کارنامەی حکومەتی نوێی عێراق.

 

شاندەکەی چوارچێوەی هەماهەنگی لە نووری مالیکی، سەرۆکی هاوپەیمانیی دەوڵەتی یاسا و عەباس موسەوی، ڕاوێژکاری هاوپەیمانیی دەوڵەتی یاسا پێکدێت.

 

ئەوەی پێویستە بیزانیت: مالیکی سەرۆکی شاندی چوارچێوەی هەماهەنگیە کە زۆربەی لایەنە شیعەکانی بەژدار لە هەڵبژاردنی تێدایە و خاوەنی زیاتر لە 150 کورسی پەرلەمانن.

 

لەلایەکی دیکەوە: پێش سەردانەکەی بۆ هەولێر و کۆبوونەوەی لەگەڵ سەرۆک بارزانی، نووری مالیکی، سەرۆکی هاوپەیمانیی دەوڵەتی یاسا لە چاوپێکەوتنێکی تەلەڤزیۆنیدا لەگەڵ کەناڵی "شەمس"، ڕایگەیاندبوو "لەگەڵ سەرۆک بارزانی زۆرجار لەڕێگەی تەلەفۆنەوە قسەمان کردووە، بەڵام ئەو دۆخەی ئێستا تێیداین و ئەو ئەرکەی لەسەرمان جێبەجێی بکەین لە پرۆسەی سیاسی لە دوای هەڵبژاردن، پێویستی بە دیالۆگی ڕاستەوخۆ هەیە، هەر بۆیەش سەردانی دەکەم بۆ چارەسەرکردنی ئەو کێشانەی هەن".