شاخەوان عەبدوڵڵا: پارتی پێداگرە لەسەر جێبەجێکردنی دەستوور

ئاڤا نیوز

پارتی دیموکراتی کوردستان؛ وەک حیزبی خاوەن زۆرترین دەنگ لە هەڵبژاردن جێبەجێکردنی دەستوور دەکاتە یەكێک لە مەرجەکانی بۆ پێکهێنانی کابینەی نوێی حکومەتی عێراق.

وێنە گەورەکە: 11 ڕۆژ بەسەر هەڵبژاردنی خولی شەشەمی پەرلەمانی عێراق تێدەپەڕێت، جموجۆڵی لایەنەکان بۆ پێکهێنانی حکومەت کارا بووە، لایەنەکان ڕوو لە هەرێمی کوردستان و بەتایبەتی پیرمام دەکەن، بۆ ئەوەی پاڵپشتی پارتی بەدەستنهێنن.

لێدوانی فەرمی: د. شاخەوان عەبدوڵڵا، ئەندامی کۆمیتەی ناوەندی پارتی و کاندیدی دەرچووی ئەو حیزبە لە کەرکووک بە ئاڤای گوت، "لەگەڵ جووڵەی لایەنەکان بۆ پێکهێنانی حکومەت یەکێک لە مەرجەکانی پارتی ئەوەیە دەستوور جێبەجێ بکرێت، ئەرکی ئێمەش لە پەرلەمان ئەوەیە بەغدا پابەند بکەین بە جێبەجێکردنی دەستوور، چونکە جێبەجێکردنی دەستوور سەقامگیری لە عێراق دێنێتە ئاراوە، سیستمی فیدراڵی لە عێراق بەهێز دەکات."

زانیاریی زیاتر: شاخەوان عەبدوڵڵا، لە بەشێکی دیکەی قسەکانیدا ئاماژەی بەوەدا، ئەمجارە ئەرکی ئێمە لە پەرلەمانی عێراق قورس دەبێت، چونکە بەشێکی ئەم هێزانەی ئێستا هاتوونەتە پەرلەمان پێشووتر هەڵوێستیان بەرامبەر هەرێمی کوردستان باش نەبووە درۆنیان ناردووە بۆ سەر بەرژوەندییەکانی هەرێمی کوردستان، ئێستا کورسیان لە پەرلەمان بەدەستهێناوە.