مەیسان: پێکدادان لە نێوان عەسائیب و سەرایا سەلام ڕووی دا

ئاڤا نیوز

 

بەهۆی کوشتنی سەرکردەیەکی ڕەوتی سەدر لە پارێزگای مەیسان، شەڕ و پێکدادانی توند لە نێوان چەکدارانی عەسائیب ئەهلی حەق و سەرایا سەلام لە درەنگانی شەوی ڕابردووە وە هەڵگیرساوە.

 

زانیاریی بەدەستهاتوو: میدیای عێراق دەڵێت: سەرکردەیەکی سەرایا سەلام کە خەڵکی پارێزگای بەسرەیە، لە کاتی سەردانێکی بۆ گەڕەکی "موعەلیمین"ی کۆن لە پارێزگای مەیسان، لەلایەن چەکدارانی نەناسراوەوە تەقەی لێکراوە و دەستبەجێ گیانی لەدەست داوە، هێرشبەرەکانیش بۆ شوێنێکی نادیار هەڵاتوون.

 

چی ڕووی دا? لە دوای ڕووداوەکە، سەرایا سەلام کە باڵی چەکداری ڕەوتی نیشتمانیی شیعەیە بە ڕابەری موقتەدا سەدر، گرووپی عەسائیب ئەهلی حەقی قەیس خەزعەلی بە ئەنجامدانی ئەو هێرشە تۆمەتبار کرد، بەو هۆیەشەوە لە شەوی ڕابردووەوە پێکدادانی چەکداری لە نێوان هەردوولادا دەستیپێکردووە. 

 

ئەمەش بزانە: ئەم گرژییانە لە کاتێکدایە کە موقتدا سەدر، ڕێبەری ڕەوتی سەدر، کەمتر لە مانگێک لەمەوبەر چالاکییەکانی سەرایا سەلامی لە هەردوو پارێزگای بەسرە و میسان سڕ کردبوو.

 

بەهۆی ئەوەی هێزەکانی پۆلیس دەسەڵاتێکی ئەوتۆیان بەسەر ئەو ناوچەیەدا نییە، پێشبینی دەکرێت ئاستی توندوتیژییەکان زیاتر بێت، ئەگەر موقتەدا سەدر بڕیارێک بۆ هێورکردنەوەی دۆخەکە و کۆتاییهێنان بە پێکدادانەکان نەدات.