مەلا بەختیار لە بارەی خۆکاندیدکردنی بۆ پۆستی سەرۆککۆمار قسە بۆ ئاڤا دەکات: بە مەرج دەکشێمەوە

ئاڤا نیوز

مەلا بەختیار، لە ڕێگای ئاڤاوە ڕایگەیاند، وەکو کاندیدی سەربەخۆ، خۆی بۆ پۆستی سەرۆککۆماری عێراق کاندید کردووە، نایەوێت ببێتە سەر ئێشە بۆ پارتی و یەکێتیی بەڵکو بەشێک دەبێت لە چارەسەریی کێشەکان. 

چیرۆکی سەرەکی: وادەی خۆکاندیدکردن بۆ پۆستی سەرۆککۆماری عێراق تەواو بووە، 81 کەس خۆیان کاندید کردووە، یەکێتی بەفەرمی نزار ئامێدی کاندید کردووە، پارتیش دوو کاندیدی هەیە د.فوئاد حوسێن و نەوزاد هادی، لایەنە سیاسییەکان و چەند کەسێکیش وەکو کاندیدی سەربەخۆ چاویان لە پۆستی سەرۆککۆماری داهاتووی عێراقە.

 

لێدوانی فەرمی: مەلا بەختیار، نووسەر و سیاسەتمەدار، لەبارەی خۆکاندیدکردنی بۆ پۆستی سەرۆککۆمار عێراق قسەی بۆ ئاڤا کرد کە بەمەرج دەکشێتەوە و وتی: "بەشێوەی سەربەخۆ، خۆم بۆ پۆستی سەرۆککۆماری عێراق کاندید کردووە، هەموو مامەڵەکانمان پێشکەشکردووە."

 

مەلا بەختیار، لە بەشێکی دیکەی قسەکانیشی وتی: نابم بە کێشە و سەر ئێشە بۆ پارتی و یەکێتیی، ئەگەر  ئەوان لەسەر پۆستی سەرۆککۆمار ڕێکبکەون، دەبم بە بەشێک لە چارەسەری کێشەی کورد و کاندیدی سەرۆککۆماری عێراق.

 

٠ لە دوای جەنابی مام جەلال بووم بە قوربانی کێشە و ململانێییەکان بەڵام من دابڕاونیم لە مێژوویی یەکێتیی نیشتیمانیی کوردستان. 

 

زانیاریی تایبەت: پارتی هەریەک لە د. فوئاد حوسێن و نەوزاد هادی کاندید کردووە، یەکێتییش بەفەرمی نزار ئامێدی کاندید کردووە، یەکگرتوویی ئیسلامی کوردستانیش د. موسەننا ئەمینی بۆ پۆستی سەرۆککۆماری داهاتووی عێراق کاندید کردووە.

 

ئەوەی پێویستە بیزانیت: یەکێتی، هەرچەندە بەفەرمی نزار ئامێدی کاندید کردووە، بەڵام هەریەک لە د. لەتیف ڕەشید، جوان محەممد فواد مەعصوم کچی پێشووتری سەرۆککۆماری عێراق، ئاسۆ فەرەیدوون و مەلا بەختیار کە پێشووتر لە ناو ڕیزەکانی یەکێتی پلە و پۆستیان هەبووە، ئەمجارە وەکو کاندیدانی سەربەخۆ خۆیان بۆ پۆستی سەرۆککۆمار کاندید کردووە.