حکومەتی کوردستان دەست بە ئامادەکردنی لیستی مووچە و جێبەجێکردنی ئەرکەکانی دەکات بۆ مووچەی مانگی یەک

ئاڤا نیوز

وەزارەتی دارایی هەرێمی کوردستان دەستی بە ڕێکارە هونەرییەکان کرد بۆ ئامادەکردنی لیستی مووچەی مانگی یەک و تەواوکردنی "میزان مراجەعە"ی ساڵی ڕابردوو؛ هەرچەندە پشووەکان پڕۆسەکەیان کەمێک دواخستووە، بەڵام هەوڵەکان بۆ ناردنی لیستەکە بۆ بەغدا چڕکراونەتەوە.

وێنە گەورەکە: بۆ ئەوەی وەزارەتی دارایی عێراق مووچەی فەرمانبەرانی هەرێم بنێرێت، دەبێت حکومەتی کوردستان مانگانە چوار ئەرکی سەرەکی جێبەجێ بکات: ئامادەکردنی لیستی مووچە، ناردنی میزان مراجەعە، دابینکردنی 120 ملیار دیناری داهاتی ناوخۆ و بەردەوامبوون لە هەناردەکردنی نەوت. جێبەجێکردنی ئەم خاڵانە گەرەنتیی گەیشتنی مووچەیە بێ گرفتە یاساییەکان گەر بەغدا هیچ کێشەیەکی بۆ دروست نەکات. 

زانیاریی تایبەت: وەزارەتی دارایی و ئابووری هەرێمی کوردستان بە ئاڤای ڕاگەیاند: بەهۆی پشووی سەری ساڵەوە لیستی مووچە ناتوانرێت هاوشێوەی مانگەکانی تر 10ی مانگ بنێردرێت تاوەکو 15ـی مانگ تەواو دەبێت و ڕەوانە دەکرێت، بەڵام سیستەمی "پەیرۆڵ" بۆ هەموو وەزارەتەکان کراوەتەوە ئەویش تاوەکو ئەوکاتە ئامادە دەبێت.

- کارکردن لەسەر تەرازووی پێداچوونەوەی (میزان مراجەعە) مانگی 12ی ساڵی ڕابردوو دەستیپێکردووە و بڕیارە تاوەکو 16ـی ئەم مانگە تەواو بکرێت.

- وەزارەتی دارایی لەبارەی ناردنی داهاتی ناوخۆ بۆ بەغدا گوتی؛ بڕی 120 ملیار دینارەکە لای وەزارەتی دارایی هەرێم ئامادەیە؛ تەنیا چاوەڕێی فەرمانی ئەنجوومەنی وەزیران دەکەن بۆ ئەوەی ڕێکارەکانی کۆکردنەوە و گواستنەوەی جێبەجێ بکەن.

لەلایەکی دیکەوە: وەزارەتی دارایی و ئابووری بە ئاڤای ڕاگەیاند: پڕۆسەکە بێ گرفت بەردەوامە. لە 27-9 تاوەکو 31-12ـی ساڵی ڕابردوو، نزیکەی 20 ملیۆن بەرمیل نەوت هەناردە کراوە، کە تێکڕای ڕۆژانەی 218 هەزار بەرمیل بووە.