پەرلەمانی عێراق: حەوت ڕۆژ مۆڵەت دەداتە فراکسیۆنەکان بۆ پێکهێنانی لیژنەکان

ئاڤا نیوز

ئەنجوومەنی نوێنەرانی عێراق ئەمڕۆ دووشەممە دووەم دانیشتنی خولی شەشەمی بە سەرۆکایەتی هەیبەت حەلبووسی ئەنجامدا، تێیدا جەخت لە ڕێکخستنی کاروباری پەرلەمان و تەواوکردنی لیژنەکان کردەوە. 

چیرۆکی سەرەکی: هەیبەت حەلبووسی، سەرۆکی پەرلەمان لە دانیشتنەکەدا ڕایگەیاند: "پێویستە کار بە پەیڕەوی ناوخۆی پەسەندکراو بکرێت و پەلە بکرێت لە پێکهێنانی لیژنە پەرلەمانییەکان، بۆ ئەم مەبەستەش حەوت ڕۆژ مۆڵەت دەدەینە فراکسیۆنەکان بۆ پێشکەشکردنی پێشنیارەکانیان سەبارەت بە دابەشبوونی ئەندامان بەسەر لیژنەکاندا".

بڕیارەکان: لە دانیشتنەکەی ئەمڕۆی پەرلەمان 229 پەرلەمانتار تێیدا ئامادە بوون، ئەم بڕیار و زانیارییانە خرانە ڕوو:

_ بڕیاردرا بە هەمیشەیی دانیشتنەکانی پەرلەمان کاتژمێر 11:00ـی سەرلەبەیانیان ئەنجام بدرێن.

_ بڕیاردرا هەفتەی داهاتوو بەرپرسانی دیوانی چاودێری دارایی، دەستەی دەستپاکی، ئەنجوومەنی خزمەت، ئەنجوومەنی پارێزگاکان، بانکی ناوەندی و سەرۆکی دەستەی خانەنشینی میوانداریی بکرێن.

_ بڕیاردرا بە چالاککردنەوە و گرنگی کاراکردنی لیژنەی هه ڵسوکەوتی پەرلەمانیی، بۆ پاراستنی چاودێری و پێگەی یاسادانانی عێراق و پەڕلەمان.

باکگراوند: ئەم دانیشتنە لە چوارچێوەی دەستپێکی کارەکانی خولی شەشەمی پەرلەمانی عێراق بوو، پاش ئەوەی هەفتەی ڕابردوو دەستەی سەرۆکایەتی هەڵبژێردران و چاوەڕێ دەکرێت لە چەند هەفتەی داهاتوو سەرۆککۆماری داهاتوو هەڵبژێردرێت و پاشان کابینەی نوێی حکومەتی عێراق پێکبهێنرێت.