بەفر و سەرما گەشتەکانی بەریتانیا، فەرەنسا و هۆڵەندای پەکخست

ئاڤا نیوز

شەپۆلێکی تووندی بەفر و سەرما هاتووچۆی ئاسمانی و زەمینی لە بەریتانیا، فەرەنسا و هۆڵەندا پەکخستووە؛ هەزاران گەشتیار لە فڕۆکەخانەکان و تونێلی "مانش" گیریان خواردووە و سەدان قوتابخانەش داخراون.

چیرۆکی سەرەکی: ئەم شەپۆلە تووندەی سەرما بڕبڕەی پشتی گواستنەوەی لەنێوان لەندەن، پاریس و ئەمستردام پچڕاندووە. پەککەوتنی هێڵی شەمەندەفەری "یۆرۆستار" و هەڵوەشاندنەوەی سەدان گەشتی ئاسمانی، نەک تەنیا گەشتیارانی پەکخستووە، بەڵکو فشارێکی زۆری خستووەتە سەر تۆڕی وزە و ژێرخانی گواستنەوە لە باکووری ئەوروپا.

پێدراوە ڕاستەکان: شەپۆلی سەرماوسۆڵە بەمشێوەیە کاریگەری لەسەر گواستنەوەی وڵاتانی ئەوروپا دروستکردووە:-

٠ لە هۆڵەندا: 700 گەشتی ئاسمانی لە فڕۆکەخانەی ئەمستردام هەڵوەشێندراونەتەوە، کە دەکاتە زیاتر لە نیوەی کۆی گەشتەکان؛ هاتووچۆی شەمەندەفەریش بە تەواوی پەککەوتووە.

٠ لە فەرەنسا: بەهۆی بەفرێکی زۆرەوە، گەشتە ئاسمانییەکان لە فڕۆکەخانەکانی پاریس 15% کەمکراونەتەوە.

٠ لە بەریتانیا: گەشتەکان لە فڕۆکەخانەکانی لیڤەرپوڵ، سکۆتلەندا و ئیرلەندای باکوور هەڵوەشێنراونەتەوە؛ هەروەها 212 قوتابخانە لە ئیرلەندای باکوور و دەیان قوتابخانەی دیکە لە وێڵز و سکۆتلەندا داخراون.

بڵاوکراوەی فەرمی: کۆمپانیای یۆرۆستار ڕایگەیاند: "بەهۆی بارودۆخی نالەباری کەشوهەواوە هاتووچۆ لە هۆڵەندا ڕگیراوە؛ داوا لە گەشتیاران دەکەین نەیەنە وێستگەکان و گەشتەکانیان دوابخەن."

- فەرمانگەی کەشناسیی بەریتانیا: "هۆشداریی سوور و زەرد تاوەکو ڕۆژی هەینی بەردەوام دەبێت؛ پلەکانی گەرما لە زۆربەی ناوچەکان بۆ خوار سفر دادەبەزن."

زانیاریی زیاتر: پێشبینی دەکرێت تاوەکو سبەی سێشەممە (6-1-2026)، پلەکانی گەرما لە زۆربەی ناوچەکانی باکووری ئەوروپا زیاتر دابەزن.

٠ شەش شەمەندەفەری سەرەکی لە نێوان لەندەن و پاریس بە تەواوی هەڵوەشێنراونەتەوە.

٠ پۆلیسی سکۆتلەندا هۆشداریی داوەتە هاووڵاتیان کە تەنیا بۆ کاری زۆر پێویست ئۆتۆمبێل بەکاربهێنن.