نەتانیاهۆ: ئەگەر ئێران هێرش بکاتە سەرمان وەڵامی تووندمان دەبێت

ئاڤا نیوز

 

بنیامین نەتانیاهۆ، سەرۆکوەزیرانی ئیسرائیل ڕایگەیاند، حکومەتەکەی بڕیارێکی گرنگیدا بۆ هێرشکردنە سەر ئێران بە مەبەستی لەناوبردنی مووشەکە بالیستییەکان  و بەرنامە ئەتۆمییەکەی ئێران، پاڵپشتی خۆشی بۆ خۆپیشاندانەکانی ئەم دوایەی ئێران دەربڕی. 
 
لێدوانی فەرمی: بنیامین نەتانیاهۆ، سەرۆکوەزیرانی ئیسرائیل، لە بەردەم پەرلەمانی وڵاتەکەی ڕایگەیاند: "سەرەڕای هەبوونی گوشارێکی زۆری ناوخۆیی و دەرەکی، توانیوومانە چەندین بڕیاریی چارەنووسساز بدەین". سەرۆکوەزیرانی ئیسرائیل وتیشی: ئەگەر لەلایەن ئێرانەوە هێرشمان بکرێتەسەر، وەڵامدانەوەکەمان زۆر سەخت و ترسناک دەبێت. 
 
بنیامین ناتانیاهۆ سەبارەت بە خۆپیشاندانەکانی ئێرانیش دەڵێت: "خۆپیشاندانەکان لە ئێران ڕووی لە فراوانبوونە، پاڵپشتی گەلی ئێران دەکەین، لەوانەیە ئێستا کاتێکی چارەنووسساز بێت بۆ ئەوەی گەلی ئێران خۆیان بڕیار لەسەر چارەنووسی خۆیان بدەن."
 
زانیاریی زیاتر: بەگوێرەی قسەکانی ناتانیاهۆ، پەیوەندییەکانی نێوان تەل ئەڤیڤ و واشنتن، لەبارەی پرسی بەرنامە ئەتۆمییەکەی ئێران، یەک هەڵوێستە و هەردوولا بەهیچ شێوەیەکیش ڕێگا نادەن ئێران یۆرانیۆم بپیتێنێت.  
 
ئەمەش بزانە: ئیسرائیل سەبارەت بە ئۆپەراسیۆنەکەی ئەمریکا لە ناو خاکی ڤەنزوێلا و دەستگیرکردنی نیکۆلاس مادۆرۆ، پاڵپشتی بڕیارەکانی دۆناڵد ترەمپی کرد.