سیناریۆکانی ڕۆژی هەڵبژاردنی سەرۆککۆماری داهاتووی عێراق

ڕۆژی 28-1-2026 کۆتا وادەیە بۆ هەڵبژاردنی سەرۆککۆماری داهاتووی عێراق، چونکە بەپێی دەستوور، دەبێت دوای مانگێک لە هەڵبژاردنی سەرۆکی پەرلەمان، سەرۆککۆمار هەڵبژێردرێت ئەوەش پاش بە دەستهێنانی دوو لەسەر سێی دەنگەکانی پەرلەمانتاران.

 

وێنە گەورەکە: پەرلەمانی عێراق لە 329 پەرلەمانتار پێکهاتووە، کۆبوونەوەکە بە ئامادەبوونی 220 پەرلەمانتار ڕێژەی یاسایی تەواو دەبێت، بەڵام ڕەنگە نزیکەی 300 پەرلەمانتار ئامادەبن، دەبێت لە گەڕی یەکەم یەکێک لە کاندیدەکان 220 دەنگ بەدەست بهێنێت، ئینجا دەردەچێت، ئەگەر لە گەڕی یەکەم هیچ کاندیدێک 220 دەنگی نەهێنا، هەڵبژاردن دەچێتە گەڕی دووەم و دوو کاندید کە زۆرترین دەنگیان هێناوە لە گەڕی یەکەمدا دەمێننەوە، کامیان زۆرترین دەنگ بهێنێت دەبێتە سەرۆکۆمار.

 

رێکارەکان: بە بڕیاری دادگای فیدراڵی، لەو 81 کەسەی خۆیان کاندید کردووە، ئەگەر هیچ کەسێکیان 221 دەنگی لە گەڕی یەکەمدا بەدەست نەهێنا، بۆ گەڕی دووەم 79 کەسیان دووردەخرێنەوە و تەنها دوو کاندید دەمێننەوە، ئەوانەی زۆرترین دەنگیان هێناوە، ئینجا دەبێت یەکێک لەو دوو کاندیدە 221 دەنگ بهێنێت.

 

باکگراوند: هێشتا لایەنە کوردستانییەکان یەکدەنگ نین و کاندیدی هاوبەشیان نییە، بەتایبەتی پارتی و یەکێتی، ئەمڕۆ پارتی هەریەک لە د.فوئاد حوسێن و نەوزاد هادی کاندید کرد، یەکێتیش بە ڕەسمی نزار ئامێدی کاندید کرد، جگە لەوەی لەناو یەکێتیدا چەند کەسێک خۆیان کاندید کردووە، لەوانە لەتیف ڕەشید، ئاسۆ فەرەیدوون، شوان داودی، جوان فوئاد مەعسووم، هەروەها موسەننا ئەمین، کاندیدی یەکگرتوو، کۆمەڵ و هەڵوێستە، لە کۆتاییشدا مەلا بەختیار وەکو کاندی سەربەخۆ ناوی خۆی تۆمارکردووە.