کارگەیەکی گەورەی هەولێر سووتا و 20 تیم لە ئەرکدان بۆ کۆنترۆڵکردنی ئاگرەکەی

ئاڤا نیوز

بەرەبەیانی ئەمڕۆ، ئاگرێکی گەورە لە کارگەیەکی بەرهەمهێنانی چپس لەسەر ڕێگەی سەرەکیی هەولێر-پیرمام کەوتەوە؛ ئاگرەکە زیانێکی زۆری ماددی بە ڕووبەری چوار هەزار مەتر چوارگۆشە گەیاندووە، بەڵام هیچ زیانێکی گیانی نەبووە.

چیرۆکی سەرەکی: کاتژمێر 06:00ـی بەیانیی ئەمڕۆ سێشەممە (6-1-2026)، ئاگرێکی گەورە لە کارگەیەکی بەرهەمهێنانی چپس لەسەر ڕێگەی سەرەکیی هەولێر-پیرمام کەوتووەتەوە، 20 تیمی بەرگریی شارستانی لە ناو هەولێر و دەوروبەرییەوە سەرقاڵی کۆنتڕۆڵکردنی ئاگرەکەن.

زانیاریی زیاتر: بوونی بڕێکی زۆر لە "ڕۆنی خواردن، نایلۆن و کارتۆن" بووەتە هۆی ئەوەی ئاگرەکە بە خێرایی تەشەنە بکات و کۆنتڕۆڵکردنی زەحمەت بێت.

لێدوانی فەرمی: موقەدەم شاخەوان سەعید، وتەبێژی بەرگریی شارستانیی هەولێر بە ئاڤای ڕاگەیاند: "ئاگرەکە زۆر گەورەیە و ڕووبەری زیاتر لە چوار هەزار مەتر چوارگۆشەی گرتووەتەوە. تیمەکانمان هەموو هەوڵێکیان دا ئاگرەکە نەگاتە ماڵەکانی دەوروبەر. تاوەکو ئێستا هۆکاری سەرەکیی کەوتنەوەی ئاگرەکە نەزانراوە."