لە هەولێر پێشبڕکێیەکی جیاوازی تایبەت بە ژینگە سازدەکرێت

ئاڤا دیجیتاڵ

لە هەولێر پێشبڕکێیەکی تایبەت بە ژینگە لە نێوان نەخۆشخانە و بنکە تەندروستییەکان سازدەکرێت، پێشبڕکێکە جیاوازە و ماوەی دوو مانگ ئامادەکاری بۆ دەکرێت، دواتر لیژنەیەکی تایبەت بڕیار لەسەر براوە دەدات.

چیرۆکی سەرەکی: بەمەبەستی بایەخدان بە ژینگە و زیادکردنی رێژەی سەوزایی و بەخشینی سیمایەکی جوان و شارستانی بە بنکە تەندروستی و نەخۆشخانەکان، هاوکات بایەخدان بە پاکوخاوێنی و ئارامکردنەوەی دەروونی نەخۆشەکان، کۆمەڵە پزیشکێک بەسەرپەرشتی بەڕێوەبەرایەتیی گشتی تەندروستیی هەولێر، پێشبڕکێیەکی ژینگە لەنێوان بنکە نەخۆشخانە و بنکە تەندروستییەکان سازدەکەن. پێشبڕکێکە سەرەتا لە پارێزگای هەولێر و دواتر لە سەرجەم شار و شارۆچکەکانی هەرێمی کوردستان و تەنانەت عێراقیش سازدەکرێت.

بۆچی گرنگە: لە جیهانی مۆدێرندا کە ژینگە قەیرانێکی نێودەوڵەتییە، یەکێک لە پێوەرەکان بۆ حوکمڕانی باش و کۆمەڵگەی هۆشیار و کەسایەتیی باش بایەخدانە بە ژینگە و پاکڕاگرتنی، چونکە راستەوخۆ پەیوەندی بە ژیانی هەموو خەڵکەوە هەیە. سازکردنی ئەم پێشبڕکێیە لەکاتێکدایە یەکێک لە بڕگەکانی کارنامەی کابینەی نۆیەمی حکومەتی هەرێمی کوردستان بەسەرۆکایەتیی مەسرور بارزانی، بایەخدان بە ژینگە و زیادکردنی رێژەی سەوزایی لە سەنتەری شارەکان.

لێدوانی فەرمی: د.محەممەد حەسەن، پزیشکی پسپۆڕی نەخۆشییەکانی منداڵان، خاوەنی بیرۆکەی پێشبڕکێکە، لەڕێگەی ئاڤا میدیاوە بانگەوازی بۆ سەرجەم نەخۆشخانە و بنکە تەندروستییەکانی هەولێر کرد گرنگی بە ژینگە و سەوزایی بدەن، بەمەبەستی بەخشینی سیمایەکی جوان و شارستانی بە شوێنەکانیان، ئەمەش لەپێناو راگرتنی باری دەروونی نەخۆش و ئەو کارمەندانەی لەوێ کار دەکەن بەشێوەیەکی تەندروست.

زانیاری زیاتر: پێشبڕکێکە بۆ زیاتر دابینکردنی سەوزایی و ژینگەیەکی جوانە لە بنکە تەندروستی و نەخۆشخانەکان، لە رێککەوتی 24-1-2024 دەست بە ئامادەکاری کراوە و لە 16-4-2024 کۆتایی دێت، ئەم پێشبڕکێیەش بە هەوڵی بەڕێوەبەرایەتیی گەشتی تەندروستی هەولێر و بنکە تەندروستی و نەخۆشخانەکان بەڕێوەدەچێت و ساڵانە بەردەوام دەبێت.


شێوازی جێبەجێکردن: دوای تەواوبوونی ماوەی دیاریکراوی پێشبڕکێ و کۆتاییهاتنی وادەکەی، لیژنەی چاودێری، بە کۆمەڵێك رێسا لەوانە؛ شێوازی سەیرکردن و پێوانەی رێژەی سەوزایی و پاکوخاوێنی، بڕیار لە سەرکەوتووترین و پێشەنگترین بنکە تەندروستی و نەخۆشخانەکان دەدرێت.

شێوازی پێشبڕکێ:

- دیاریکردنی بنکە تەندروستی و نەخۆشخانەکان بە بڕیاری لیژنەی سەرپەرشتی پێشبڕکێ، زیاتر ئەو بنکە و نەخۆشخانانەی کە ویستیان لەسەرە و نەخۆش زۆر رووی تێدەکەن.

- لە ساڵێکدا ماوەی چەند مانگێك دیاریدەکرێت بۆ بنکە تەندروستی و نەخۆشخانەکان بەمەبەستی خۆئامادەکردنیان و ئەنجامدانی پێشبڕکێ.

- چاودێریکردنی پێشبڕکێ لەلایەن لیژنەی تایبەتمەند و بەدواداچوون.

- دوای تەواوبوونی ماوەی پێشبڕکێ هەڵسەنگاندن ئەنجام دەدرێت.

ئامانجی پێشبڕکێکە:

- زیادکردنی رێژەی سەوزایی و رێکخســتن و جوانکردن لە بنکە تەندروستی و نەخۆشخانەکان و پاراستنی ژینگەی ناویان.

- دیاریکردنی زەوی بەتاڵ و بەجێهێڵراو و تەرخانکردنی بۆ چاندنی درەخت.

- هەوڵدان بۆ دانانی گوڵ و مەرکان لە ناوەوەی بنکە و نەخۆشخانەکان و خزمەتکردنیان.

- بەخشینی سیمای جوان و رازاوە بە بنکە تەندروستی و نەخۆشخانەکان و دەرکەوتنیان بە شێوازێکی مۆدێرن و شارستانیانە.

- بەرزکردنەوەی رێژەی ئۆکسجین لەڕێگـەی درەختەوە کە رۆڵی گرنگی هەیە لە بەرەوپێشبردنی تەندروستیی مرۆڤ، بەتایبەت نەخۆشەکان.

- هاندانی پزیشکان و کارمەندان و هەموو ستافی بنکــە تەندروستی و نەخۆشخانەکان بۆ بڵاوکردنەوەی هۆشیاری ژینگەیی لە کۆمەڵگەدا.