ئێران: سەرکەوتنی ترەمپ دەرفەتە بۆ  پێداچوونەوە بە سیاسەتەکانی ئەمریکا

ئاڤا نیوز

دوێنی سەرکەوتنی ترەمپ کاردانەوەی جیهانی لێکەوتەوە و ئێرانیش سەرکەوتنی ترەمپ بە دەرفەتێک بۆ پێداچوونەوە بە سیاسەتەکانی ئەمریکا دەزانێت.

 

وێنە گەورەکە: لە سەردەمی ترەمپ پەیوەندییەکانی ئێران و ئەمریکا بە تایبەتی دوای کشانەوەی لە ڕێککەوتنی ئەتۆمی و کوشتنی قاسم سولەیمانی خراپتر و ئاڵۆزتر بوو، هاوکات سزای زیاتر بەسەر ئێراندا سەپێندرا.

 

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران بۆ ئاژانسی هەواڵی ئیرنا ڕایگەیاند: '' ئەزموونی زۆر تاڵمان لەگەڵ سیاسەت و ئاراستەکانی پێشووی ئیدارە جیاوازەکانی ئەمریکا هەیە، بۆیە سەرکەوتنی ترەمپ "دەرفەتێکە بۆ پێداچوونەوەی سیاسەتەکەی لەلایەن واشنتنەوە''.

 

لەلایەکی دیکەوە: دوێنێ فاتیمە موهاجرانی، وتەبێژی حکومەتی ئێران گوتی: ''گرنگ نییە کێ دەبێتە سەرۆکی ئەمریکا، چونکە هیچ گۆڕانکارییەک لە بژێوی خەڵکدا ڕوونادات''.

 

باکگراوند: لە مانگی پێنجی  2018  دۆناڵد ترەمپ بە شێوەیەکی تاکلایەنە وڵاتەکەی لە ڕێککەوتنی ئەتۆمی کشاندەوە و سزای توندی بەسەر تاران سەپاند، بەتایبەتی لە کەرتی نەوت.