دەستپێشخەریی مەسروور بارزانی هەنگاوەکانی پێکهێنانی کابینەی 10 خێراتر دەکات

ئاڤا نیوز

 

دەستپێشەخەریی نیشتمانیی  مەسروور بارزانی، سەرۆکوەزیرانی کوردستان  بۆ یەکدەنگی و یەکهەڵوێستی لایەنە کوردستانییەکان بەرامبەر بەغدا لەپێناو دابینکردنی مووچە و بودجە و مافەکانی خەڵکی کوردستان، کەشێکی سیاسی ئەرێنی ڕەخساندووە و  هەنگاوەکانی پێکهێنانی کابینەی 10 خێراتر دەکات.

 

وێنە گەورەکە: سەرجەم لایەنەکان پشتیوانی لە دەستپێشخەرییەکەی مەسرور بارزانی دەکەن و تێگەیشتوون کە بەبێ جێبەجێکردنی، کورد ناتوانێت یەکدەنگ و یەکهەڵوێست بێت بەمەش هاوشێوەی ساڵانی ڕابردوو ناتوانرێت مووچە و بودجە و شایستە داراییەکان و مافە یاسایی و دەستوورییەکانی خەڵکی کوردستان دابین بکرێن.

زانیاریی تایبەت: لەبارەی پێکهێنانی حکومەت لە دوایین کۆبوونەوەی هەردوو شاندی تەکنیکی پارتی و یەکێتی کە کۆتایی هەفتەی ڕابردوو کرا، داواکارییەکانی یەکێتی لە ڕەشنووسی کارنامەی کابینەی 10 جێکراونەتەوە، پێشتریش ئاڤا میدیا ئەوەی باس کردبوو کە داواکارییەکانی یەکێتی بریتیبوون لە هاوبەشی لە دەسەڵات و چەند وەزارەتێکی سیادی، ئێستا تەنیا ئەوەندە ماوە هەنگاوی کرداری بنرێت بۆ پێکهێنانی حکومەت.

هەڵوێستی لایەنەکان: جگە لە پارتی و یەکێتی کە دوو لایەنی سەرەکی پێکهێنەری حکومەتن؛ 

٠ نەوەی نوێ کە هێزی سێیەمە و 15 کورسی لە پەرلەمانی کوردستان هەیە، تاوەکو ئێستا یەکلایی نەبووەتەوە بەشداری دەکات یان وەکو ئۆپۆزیسیۆن دەمێنێتەوە و چاوەڕوانی ئۆفەری پارتی و یەکێتییە.

٠ یەکگرتووی ئیسلامیی کوردستان کە خاوەنی 7 کورسییە، هەرچەندە پێشتر ڕایانگەیاندبوو بەشداری ناکەن و وەکو ئۆپۆزیسیۆن دەمێننەوە، بەڵام بەپێی زانیارییەکانی ئاڤا میدیا، دوای کۆنگرە چاوەڕێی سەرکردایەتیی نوێی یەکگرتوو دەکرێت بڕیاری کۆتایی بدەن.

٠ بەرەی گەل کە لاهوور شێخ جەنگی سەرۆکایەتیی دەکات ئەویش تا ئێستا خۆی یەکلانەکردووەتەوە.

٠ بسۆسیالیست و پێکهێاتەکانی دیکە، واتا تورکمان و کریستیانەکان خۆیان یەکلا کردووەتەوە و بەشداری حکومەت دەکەن. 

باکگراوند: دوێنێ شەممە بە دەستپێشخەری و سەرپەرشتی سەرۆکوەزیران مەسرور بارزانی، ئەنجوومەنی وەزیرانی کوردستان بە بەشداریی نوێنەرانی کورد لە بەغدا (وەزیر و سەرۆک فراکسیۆنە کوردستانییەکان لە حکومەت و پەرلەمانی عێراق) کۆبونەوەیەکی نائاسایی کرد و ڕێککەوتن سەرجەم لایەنەکان یەکدەنگ و یەکهەڵوێست بن بەرامبەر بەغدا، سێ بڕیاریش دەکران، بڕیارە شاندێکی هاوبەشی پارتی و یەکێتیش پەیامەکە بگەیێننە سوودانی کە ئەگەر هاوشێوەی ساڵی ڕابردوو مووچە و بودجەی خەڵکی کوردستان نەنێردرێت هەڵوێستی تووند وەردەگرن.