شاندی هاوبەشی پارتی و یەکێتی بۆ لای سوودانی بۆ ساڵی 2025 دیاریکرا

ئاڤا نیوز

 

شاندی هەرێمی کوردستان بۆ کۆبوونەوە لەگەڵ سەرۆکوەزیرانی عێراق تایبەت بە داواکارییەکانی هەرێمی کوردستان بۆ ساڵی 2025 دیاریکرا، شاندەکە لە دوو وەزیری پارتی و وەزیرێکی یەکێتی و جێگری سەرۆکی پەرلەمانی عێراق پێکهاتوون.

 

وێنە گەورەکە: دوێنێ شەممە 11-01-2025، ئەنجوومەنی وەزیرانی هەرێمی کوردستان بە سەرپەرشتیی سەرۆکوەزیران مەسرور بارزانی و ئامادەبوونی قوباد تاڵەبانی و نوێنەرانی هەرێمی کوردستان لە بەغدا لەبارەی مووچە و بودجە و مافە دەستووری و یاساییەکانی هەرێمی کوردستان کۆبوونەوەیەکی نائاسایی کرد. لە کۆبوونەوەکەدا پەیوەست بە داواکارییەکانی هەرێمی کوردستان لە حکومەتی عێراق بۆ ساڵی 2025 سێ بڕیار دەرچوون.

 

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان بۆ ئاڤا میدیا ناوی نوێنەرانی هەرێمی کوردستان لە حکومەتی عێراق بۆ کۆبوونەوە لەگەڵ سوودانی ئاشکرا دەکات و ڕایگەیاند: هەر یەکە لە فوئاد حوسێن، وەزیری دەرەوە و خالید شوانی، وەزیری داد و بەنگین ڕێکانی، وەزیری ئاوەدانکردنەوە و شاخەوان عەبدوڵڵا، جێگری سەرۆکی پەرلەمانی عێراق ڕاسپێردران تا بڕیارەکانی کۆبوونەوەکەی دوێنێی ئەنجوومەنی وەزیران بگەیێننە بەغدا.

 

لەلایەکی دیکەوە: وتەبێژی حکومەتی هەرێمی کوردستان دوای کۆتاییهاتنی کۆبوونەوەی ئەنجوومەنی وەزیران بە ڕۆژنامەنووسانی ڕاگەیاند: بۆ ئەمساڵ ئەگەر بەغدا شایستە داراییەکانی هەرێمی کوردستان وەک خۆی خەرج نەکات، لەوانەیە هەولێریش بڕیارێک بدات کە خزمەت بە ئارامی سیاسی عێراق ناکات.