لە ئەڵمانیا خۆپیشاندانێکی فراوان بۆ پشتگیریی ڕۆژئاوای کوردستان بەڕێوەدەچێت

ئاڤا نیوز

کۆنفیدراسیۆنی ڕەوەندی کوردستانی بۆ پشتیوانیی لە ڕۆژئاوای کوردستان، خۆپیشاندانێکی فراوان لە شاری "بۆن"ـی ئەڵمانیا ڕێک دەخات و تێیدا پەیامی سەرۆک بارزانی دەخوێندرێتەوە.

لێدوانی فەرمی: هەرمن ئەحمەد، بەرپرسی ئۆفیسی ڕاگەیاندنی کۆنفیدراسیۆنی ڕەوەندی کوردستانی بە ئاڤای ڕاگەیاند: ئامانجمان ناردنی پەیامێکی سیاسیی توندە بۆ ئەوروپا کە ئیتر کورد بێدەنگ نابێت؛ پرسی ڕۆژئاوا پرسێکی ڕەوای مافەکان و مرۆڤایەتییە و پێویستیی بە هەڵوێستی جدیی نێودەوڵەتیی هەیە.

زانیاریی زیاتر: خۆپیشاندانەکە لەژێر دروشمی "پشتگیریی، پشتیوانیی و یەکدەنگیی کورد" بەڕێوەدەچێت و بڕیارە ڕۆژی شەممە 31-01-2026 لە کاتژمێر 1:00ـی دوای نیوەڕۆ لە شاری بۆن دەستپێبکات. جگە لە جەماوەری کورد، ژمارەیەک لە هونەرمەندانی دیار لە ناوخۆ و دەرەوەی کوردستان بەشداریی تێدا دەکەن تاوەکو لەرێگەی هونەرەوە دەنگی مەزڵوومییەتی ڕۆژئاوا بگەیەنن.

ئەمەش بزانە: ئەم هەڵمەتە تەنها ئەڵمانیا ناگرێتەوە، بەڵکو فیدراسیۆنەکانی سەر بە کۆنفیدراسیۆن لە تەواوی شارەکانی ئەوروپا، ئەمریکا و کەنەدا سەرقاڵی ڕێکخستنی چالاکیی هاوشێوەن بۆ دروستکردنی فشاری میدیایی و گۆڕینی ئاڕاستەی بڕیارە نێودەوڵەتییەکان لە بەرژەوەندیی کورد، کە تێیدا جەخت لە هەڵگرتنی ئاڵای کوردستان و نیشاندانی یەکهەڵوێستیی دەکرێتەوە.