وێنەی دوو منداڵی بەشداری خۆپیشاندانەکان دەخرێتە سەر بەرگی کتێبەکانی خوێندن

ئاڤا نیوز

وەزیری پەروەردەی حکومەتی هەرێمی کوردستان بڕیاری دا، وێنەی ئەو دوو منداڵەی کە بوونە هێمای نیشتیمانپەروەری و خۆشەویستی کوردستان بخرێتە سەر بەرگی کتێبەکانی خوێندنی ساڵی داهاتوو.

لێدوانی فەرمی: ئالان حەمە سەعید، وەزیری پەروەردە لە هەژماری فەرمی خۆی لە تۆڕی کۆمەڵایەتیی فەیسبووک ڕایگەیاند، بڕیارمان دا بۆ ساڵی خوێندنی 2026-2027 دوو دیارترین وێنەی منداڵانی بەشدار لە خۆپیشاندانەکان بخەینە سەر بەرگی کتێبی خوێندن.

ئەوەی پێویستە بیزانیت: یەکێک لە منداڵەکان خاوەن پێداویستیی تایبەتە و بە تەنیا قاچێکەوە ئاڵای کوردستانی خستووەتە سەر شانی و بەشداری خۆپیشاندانەکانی پاڵپشتیی هەولێری بۆ ڕۆژئاوای کوردستان کردووە. وەزیری پەروەردە دەڵێت وێنەی ئەو منداڵە دەخرێتەسەر بەرگی کتێبی کوردی پۆلی شەشەمی بنەڕەتی.

- منداڵێکی دیکە تەمەن دوو ساڵ و سێ مانگ بوو، بەشێوەیەکی بەربڵاو ڤیدیۆکەی بڵاوبووەوە، دەردەکەوێت مەمکەوشکەیەکی لە دەمدایە و ئاڵای کوردستانی بەسەر شانەوەیە. لەکاتی دەربڕینی هاوسۆزی بۆ ڕۆژئاوای کوردستان لە شاری سلێمانی بینرا، وێنە سەرنجڕاکێشەکەی دەخرێتە سەر بەرگی کتێبی کوردی پۆلی یەکەمی بنەڕەتی.

زانیاریی زیاتر: وەزیری پەروەردە ئاماژەی بەوەش کردووە، ئەم بابەتە مانایەکی قوڵی هەیە و گوزارشتە لە پەروەردەکردنێکی نیشتیمانیانەی نەوە دوای نەوە.

باکگراوند: ماوەی دوو هەفتەیە کوردانی هەر چوارپارچەی کوردستان و تاراوگە بەیەکگرتوویی خۆپیشاندانی جەماوەری بۆ ڕۆژئاوای کوردستان ڕێکدەخەن، لەو ماوەیە دیمەنی سەرنجڕاکێش لەناو خۆپیشاندانەکان دەبینران، وێنەی ئەو دوو منداڵە دیارترین وێنەی ئەو ماوەیە بوو.