تیپی هونەرە میللییەکانی دهۆک بە نوێنەرایەتیی كوردستان بەشداریی فێستیڤاڵێكی نێودەوڵەتی دەكات

ئاڤا نیوز

تیپی هونەرە میللییەکانی دهۆک، بە مەبەستی بەشداریكردن لە فێستیڤاڵی نێودەوڵەتیی هونەر و موزیک، بەرەو هیندستان بەڕێكەوت، بڕیارە هەڵپەڕكێ و ستران بە جلی کولتووریی كوردییەوە پیشانی جیهان بدەن.

چیرۆکی سەرەکی: فێستیڤاڵی نێودەوڵەتیی هونەر و موزیک لە 31ـی ئەم مانگە لە وڵاتی هیندستان دەستپێدەكات و تاوەكوو 15ـی شوباتی داهاتوو بەردەوام دەبێت كە لەلایەن وەزارەتی هونەر و ڕۆشنبیریی هیندستانەوە سەرپەرشتی دەكرێت. ئەمساڵ 39ـەمین خولی فێستیڤاڵەكەیە كە بە "سوراجكوند هاریانا" دەناسرێت و ئەمجارە لە شاری فەریدئاباد بەڕێوەدەچێت، تیپی هونەرە میللییەکانی دهۆک بە نوێنەرایەتیی هەرێمی كوردستان بە هەڵپەڕكێ و سترانی ڕەسەنی كوردی بەشداری لە فێستیڤاڵەكەدا دەكات.

لێدوانی فەرمی: سەرچاوەیەک لە کۆنسوڵخانەی هیندستان لە هەولێر بە ئاڤای ڕاگەیاند، لە چوارچێوەی هەماهەنگیی نێوان وەزارەتی ڕۆشنبیری و لاوانی حكومەتی هەرێمی كوردستان و کۆنسوڵخانەی هیندستان لە هەولێر، ئەمڕۆ پێنجشەممە تیپی هونەرە میللییەکانی دهۆک بۆ بەشداریکردن لە فێستیڤاڵێکی نێودەوڵەتیی هونەر بەرەو هیندستان بەڕێکەوت، بڕیارە لە ڕۆژانی بەڕێوەچوونی فێستیڤاڵەكەدا هاوشێوەی نەتەوە و گەلانی دنیا، تابلۆی شایی و هەڵپەڕكێی كوردی بە دەنگ و سترانی کولتووریی كوردییەوە نمایش بكرێت.

ئەوەی پێویستە بیزانیت: فێستیڤاڵی نێودەوڵەتیی "سوراجکوند هاریانا" بە یەکێک لە گەورەترین فێستیڤاڵە هونەری و کولتوورییەکانی هیندستان هەژمار دەکرێت و ساڵی ڕابردوو، 600 هونەرمەند و تیپی هونەری لە 44 وڵاتی جیهانەوە بەشدارییان تێدا کردبوو.