بەهۆی خۆپیشاندانەکانی پشتیوانیی لە ڕۆژئاوا کۆگاکانی ئاڵای کوردستان بەرەو بەتاڵبوون دەچن

ئاڤا نیوز

بەهۆی بەردەوامیی خۆپیشاندانەکانی پشتیوانی لە ڕۆژئاوای کوردستان، خواستی هاونیشتمانیان لەسەر کڕینی ئاڵای کوردستان ژمارەی پێوانەیی تۆمارکردووە. بەپێی وتەی بازرگانان، بەهۆی ئەو خواستە زۆرەوە کە خەڵکی ڕۆژانە زیاتر لە ئاڵایەک دەکڕن، کۆگاکانیان نزیکە لەوەی بە تەواوی بەتاڵ ببن.

 

وێنە گەورەکە: ڕۆژانە لە هەولێر، سلێمانی و زۆربەی شار و شارۆچکەکانی دیکەی هەرێمی کوردستان، جەماوەرێکی زۆر بەبێ جیاوازی تەمەن و ڕەگەز دەڕژێنە سەر شەقامەکان بۆ پشتیوانی لە کوردانی ڕۆژئاوا. لەم خۆپیشاندانانەدا هاونیشتمانیان بە هەڵکردنی ئاڵای کوردستان پەیامی هاوسۆزی خۆیان دەگەیەنن.

لێدوانی فەرمی: پێشەوا لەتیف، کە یەکێکە لە بازرگانە دیارەکانی شاری سلێمانی و ساڵانێکی زۆرە کاری هاوردەکردنی ئاڵای کوردستان دەکات، بە  ئاڤای ڕایگەیاند: سەرەڕای ئەوەی بڕێکی زۆری ئاڵای هاوردە کردووە و لە دوکانەکەیدا نمایشی کردوون، بەڵام بەهۆی زۆریی کڕیارانەوە کۆگاکانی خەریکە چۆڵ دەبن.

-خواستەکە تەنها لەسەر ئاڵا نییە، بەڵکو ئەو جوانکارییانەشی کە ئاڵای کوردستانیان لەسەر نەخشێندراوە، چەندین هێندەی ڕۆژانی ئاسایی فرۆشیان زیادی کردووە.

لەلایەکی دیکە: سیڤان کاروان، یەکێکی ترە لە دوکاندارەکان و دەڵێت: "هاونیشتمانیان بە گڕوتینێکی زۆر و هەستی نیشتمانییەوە ڕوو لە دوکانەکانی فرۆشتنی ئاڵا دەکەن."

- ئامانجی کڕیاران ئەوەیە شەقامەکانی سلێمانی بکەنە تابلۆیەکی ڕەنگین بە ئاڵای کوردستان و وەک ناسنامەیەک بۆ یەکگرتوویی نیشان بدەن.