لە کەرکوک ژیانی سێ کۆرپەلە و دایکێک لە مردن ڕزگار دەکرێت

ئاڤا نیوز

 

لە ناو جەرگەی نەخۆشخانەی ئازادیی شاری کەرکوک، پزیشکان و کارمەندانی نەخۆشخانەکە گیانی دایکێک و سێ منداڵیان لە مردن ڕزگار دەکەن و بەهۆی نەشتەرگەرییەکی قورسەوە ژیانی چوار کەس لە لێواری مردن دەگەڕێنەوە.

چیرۆکی سەرەکی: دایکێکی تەمەن 22 ساڵ، لە دۆخێکی تەندروستیی سەختدا، گەیەندرایە نەخۆشخانەی ئازادی لە کەرکوک، نەک تەنیا ژیانی خۆی، بەڵکو ژیانی سێ کۆرپەلەکەی نێو سکیشی لە مەترسییدا بوون، بەڵام لێهاتوویی و هەوڵەکانی پزیشک و کارمەندانی ئەو نەخۆشخانەیە ئومێدی ژیانی بۆ گەڕاندنەوە.

لێدوانی فەرمی: دکتۆر بەڵێن عومەر، بەڕێوەبەری نەخۆشخانەی ئازادی، لە کەرکووک، بە ئاڤای وت:  نەخۆشەکە بەهۆی بەرزبوونەوەی پەستانی خوێن و کۆبوونەوەی ئاو لە سییەکانیدا، دۆخی تەندروستیی گەیشتبووە لێواری مەرگ.

دکتۆر بەڵێن دەشڵێت: "نەشتەرگەریمان بۆ ئەنجامدا، بەڵام ئەو نەشتەرگەرییە بۆ ئێمە ئاڵنگارییەکی گەورە بوو، چونکە پاراستنی ژیانی چوار مرۆڤ لە یەک کاتدا ئەرکێکی قورسە."

زانیاریی زیاتر: بەڕێوەبەری نەخۆشخانەی ئازادی، وتیشی: دوای هەوڵێکی بێوچانی تیمە پزیشکییەکەمان، مەترسییەکان ڕەوینەوە و دەنگی گریانی سێ منداڵ، کە دوو کوڕ و کچێکن هۆڵی نەشتەرگەرییەکەی پڕکرد لە خۆشی ڕزگارکردنی ژیانیان و بە سەرکەوتوویی نەشتەرگەرییەکە ئەنجامدرا. دایکەکە و کۆرپەلەکانی چارەسەر تەندروستییان وەرگرت و دواتر بە تەندروستییەکی جێگیرەوە گەڕێندرانەوە بۆ نێو خێزانەکەیان.

ئەوەی پێویستە بیزانیت: ئەم نەشتەرگەرییە یەکەمین کەیسە بەم شێوەیەیە لەم ساڵەدا لە کەرکووک تۆمار بکرێت، وەک دەستکەوتێکی گەورە لە کەرتی تەندروستیدا وێنا وەسف دەکریت.