ئەمریکا بۆ ڤەنزوێلا: لە بەرژەوەندی ئێوەدایە لەگەڵ ئێمە کار بکەن

ئاڤا نیوز

وەزیری دەرەوەی ئەمریکا لەبەردەم لیژنەی پەیوەندییەکانی دەرەوەی ئەنجوومەنی پیران ڕایگەیاند، ئێمە لە دۆخێکدا نین کە هیچ ڕێوشوێنێکی سەربازی بەرامبەر بە ڤەنزوێلا بگرینەبەر چاوەڕێی ئەوەش ناکەین، بەڵام لە بەرژەوەندی ڤەنزوێلادایە لەگەڵ ئەمریکا کار بکات.

ئەوەی پێویستە بیزانیت: نیکۆلاس مادورۆ، سەرۆکی ڤەنزوێلا بەچەندین تۆمەتی جیاوازەوە لەسەرەتای ئەم مانگە لە ئۆپەراسیۆنێکی بەرفراوانی ئەمریکادا لەلایەن هێزەکانی ئەو وڵاتەوە دەستبەسەرکرا، ڕۆدریگێز کە ئەو کات جێگری سەرۆک بوو، ئێستا سەرۆکی کاتی ئەو وڵاتەیە.

لێدوانی فەرمی: مارکۆ ڕۆبیۆ، وەزیری دەرەوەی ئەمریکا ڕایگەیاند، ئەمریکا لەگەڵ ڤەنزوێلادا لە شەڕدا نییە و ئێمە وڵاتێکمان داگیر نەکردووە.

بەرپرسانی ئەمریکا بە ئاشکرا ڕایانگەیاندووە، دەیانەوێت سەرۆکی کاتی ڤەنزوێلا پەیوەندییەکانی لەگەڵ هاوپەیمانە نێودەوڵەتییە نزیکەکانی وەک ئێران، چین و ڕووسیا بپچڕێنێت، بەڵام بەگوێرەی ڕاپۆرتە هەواڵگرییەکانی ئەمریکا ڕوون نییە کە ئایا ڕۆدریگێزی سەرۆکی ئێستای وڵات هاوکاری ئەمریکا دەکات یان نا.

لەلایەکی دیکەوە: ڕۆدریگێز وەک سەرۆکی کاتی، هەرچەندە ڕایگەیاندووە، فەرمان لە واشنتن وەرناگرێت، بەڵام لە هەمان کاتدا خەریکی گفتوگۆیە بۆ ڕاکێشانی کۆمپانیا نەوتییەکانی ئەمریکا و ئازادکردنی پارە سڕکراوەکانی ڤەنزوێلا.