دەم پارتی: هەڵوێستی تورکیا لەسەر هێرشەکانی سەر ڕۆژئاوا بۆ لەباربردنی پرۆسەی ئاشتییە

ئاڤا نیوز

هاوسەرۆکی گشتیی دەم پارتی جەخت لەوە دەکاتەوە هەڵوێستی حکومەتی تورکیا لەبارەی ڕۆژئاوای کوردستان و هێرشەکان بۆ سەر هەسەدە، بووەتە هۆی گومانبردنی زیاتری خەڵک بە پرۆسەی ئاشتی.

چیرۆکی سەرەکی: لەگەڵ دەستپێکردنی هێرش و پەلامارەکانی سوپای عەرەبی سووریا بۆ سەر ڕۆژئاوای کوردستان، تورکیا هەڵوێستی خۆی ڕاگەیاند و دەڵێت، پێویستە هێزەکانی هەسەدە تێکەڵ بە سوپای سووریا ببنەوە.

لێدوانی فەرمی: تونجەر باکرهان، هاوسەرۆکی گشتیی دەم پارتی ڕایگەیاند، لە سەرەتای دەستپێکردنی قۆناغی نوێی پرۆسەی ئاشتی تاوەکو ئێستا حکومەتی تورکیا جگە لە پێکهێنانی کۆمیسیۆنە پەرلەمانییەکە، هیچ هەنگاوێکی کردەیی و ڕاستەقینەی بۆ سەرخستنی پرۆسەکە نەناوە و تەنیا کاتی کوشتووە.

ئاماژەی بەوەشکرد، تورکیا یەک لەسەر هەزاری ئەو وزەیەی بۆ دروستکردنی ئاڵۆزی لە سووریا دەیدا، بۆ پرۆسەی ئاشتی دابووای، ئێستا دۆخەکە بە جۆرێکی دیکە دەبوو و هۆشداریش دەدات لەوەی سیاسەتی تورکیا لەبارەی سووریا، بۆ لەباربردنی پرۆسەی ئاشتییە.

زانیاریی زیاتر: بەگوتەی باکرهان، هێرشی گرووپە چەکدارەکانی سەر بە سوپای عەرەبی سووریا بۆ سەر حەلەب و ڕۆژئاوای کوردستان، بە تەواوی جیاوازییەکانەوە کوردانی هەر چوار پارچەی کوردستان و تاراوگەی یەکخست بۆ پاراستنی دەستکەوتەکانی ئەم پارچەیەی کوردستان.

بەتەنیشت ئەم بابەتەوە: سەبارەت بە بڵاوکردنەوەی کۆنووسەکانی دیداری عەبدوڵڵا ئۆجەلان لەلایەن سەرۆکایەتیی پەرلەمانی تورکیاوە، باکرهان ئەوە بە "حیسابێکی سیاسیی هەرزان" ناو دەبات و دەڵێت: بڵاوکردنەوەی ئەم کۆنووسانە بەبێ ئاگاداریی ئەوان و ڕێک لە کاتی هێرشەکانی سەر ڕۆژئاوا، تەنیا بۆ چەواشەکردنی ڕای گشتی و شێواندنی زەمینەی دیالۆگ بووە.

داواکاری فەرمی: بۆ سەرخستنی پرۆسەی ئاشتی، باکرهان داوای هەنگاوی کۆنکرێتی لە تورکیا دەکات؛ لەوانە کردنەوەی دەرگای دیالۆگی بەردەوام لەگەڵ عەبدوڵڵا ئۆجەلان، کۆتاییهێنان بە بەسیاسیکردنی یاسا و هەڵگرتنی گوشارەکان لەسەر زیندانییە سیاسییەکان و ئۆپۆزیسیۆن.