دوای ساڵانێک لە گرژی سەرکردەکانی چین و بەریتانیا لەسەر مێزی گفتوگۆ کۆبوونەوە

ئاڤا نیوز

کیەر ستارمەر، وەکو یەکەم سەرۆکوەزیرانی بەریتانیا دوای هەشت ساڵ چووە نێو خاکی چین و لەلایەن ژاو لێجی، سەرۆکی کۆنگرەی نەتەوەیی گەلی چین (پەرلەمان) کۆبووەوە، دواتریش چاوی بە شی جینپینگ، سەرۆکی چین کەوت. 

وێنە گەورەکە: بەهۆی زیادبوونی نیگەرانییەکان سەبارەت بە چالاکییە سیخوڕییەکانی چین لە بەریتانیا لە ماوەی ڕابردوو، پەیوەندییەکانی نێوان هەردوو وڵات لە دەیەی ڕابردوودا بە شێوەیەکی بەرچاو تێکچوو، لەگەڵ ئەوەشدا پاڵپشتییەکانی چین بۆ ڕووسیا لە جەنگی ئۆکرانیا و مامەڵەی پەکین لەگەڵ هۆنگ کۆنگدا، دۆخەکەی سەختتر کرد و هەردوولا لەیەکدی دابڕان.

هەردوو وڵات هەوڵ دەدەن کێشەکانیان وەلا بنێن و سەرنج بخەنە سەر لایەنە ئابووری و بازرگانییەکانی نێوانیان، سەرۆکوەزیرانی بەریتانیا لەگەڵ خۆیدا بەشێک لە گەورەترین بازرگانەکانی وڵاتەکەی بردە پەکین و لەگەڵ هاوتا چینییەکانیاندا تاوتوێی زیادکردنی بازرگانی نێوانیان کرد.

زانیاریی بەدەستهاتوو: حکومەتەکانی بەریتانیا و چین ڕایانگەیاندووە، دەخوازن لەم سەردانەدا ڕێککەوتنامەی هاوکاری لە بواری بازرگانی و وەبەرهێنان واژۆ بکەن، کە ئەوەش دەبێتە یەکەم هەنگاو بۆ دووبارە ڕێکخستنەوە و فراوانکردنی پەیوەندییە ئابوورییەکانی نێوانیان.

لەلایەکی دیکەوە: سەرۆکی ئەمریکا بەم ڕێککەوتنە دڵخۆش نییە و ڕەخنەشی لێگرتووە، بەڵام بە هۆی ئەو دۆخەی لە ئابووریی جیهان لە سەردەمی دەسەڵاتی ترەمپدا هاتووەتە ئاراوە، گەشەپێدانی بازرگانی و وەبەرهێنان بۆ زۆرێک لە حکومەتەکان بووەتە کارێکی هەنووکەیی و پێویست.

ئەوەی پێویستە بیزانیت: ستارمەر چوارەم کاربەدەستی وڵاتێکی هاوپەیمانی ئەمریکایە کە لەم مانگەدا سەردانی پەکین بکات، دوای سەرۆکەکانی کۆریای باشوور، کەنەدا و فینلاند. چاوەڕوانیش دەکرێت مانگی داهاتوو ڕاوێژکاری ئەڵمانیا سەردانی ئەو وڵاتە بکات.