لەبارەی ئێران ئەردۆغان پێشنیازی لووتکەیەکی سێقۆڵی بۆ ترەمپ دەکات

ئاڤا نیوز

ڕەجەب تەیب ئەردۆغان، سەرۆککۆماری تورکیا، لە هەوڵێکی نوێی دیپلۆماسیدا پێشنیازی لووتکەیەکی سێقۆڵی لە نێوان وڵاتەکەی و ئەمریکا و ئێران بۆ دۆناڵد ترەمپ کردووە، بە ئامانجی دۆزینەوەی چارەسەرێک بۆ ئاڵۆزییەکانی ناوچەکە.

چیرۆکی سەرەکی: بەپێی زانیارییەکانی ڕۆژنامەی حورییەت'ی تورکی، ئەردۆغان لە پەیوەندییەکی تەلەفۆنیدا لە 27ی کانوونی دووەم، پێشنیازی بۆ دۆناڵد ترەمپ کردووە لووتکەیەکی سێقۆڵی (بە شێوەی ڤیدیۆیی یان ڕاستەوخۆ) لە نێوان هەرسێ وڵات ئەنجام بدرێت. بەگوێرەی هەواڵی ڕۆژنامەکە، ترەمپ بە ئەرێنی پێشوازیی لەم دەسپێشخەرییەی ئەردۆغان کردووە.

لێدوانی فەرمی: ئاکیف چاغاتای کیلیچ، ڕاوێژکاری ئەردۆغان، بە میدیای تورکی ڕاگەیاندووە: "تورکیا دژی هەر دەستێوەردانێکی دەرەکییە لە کاروباری ئێراندا و پێیان وایە تەنیا ڕێگەی دیپلۆماسی دەتوانێت دۆخەکە ئاسایی بکاتەوە."

زانیاریی زیاتر: ڕۆژنامە تورکیەکە نووسیوویەتی: لە درێژەی ئەم هەوڵانەدا، بڕیارە عەباس عێراقچی، وەزیری دەرەوەی ئێران لەم هەفتەیەدا بگاتە ئەنقەرە و لەگەڵ هاکان فیدان، وەزیری دەرەوەی تورکیا کۆببێتەوە. بۆ هێورکردنەوەی گرژییەکانی نێوان تاران و واشنتن، وەزیری دەرەوەی تورکیا چەندین جار بە تەلەفۆن قسەی لەگەڵ هاوتا ئێرانی و ئەمەریکییەکەی کردووە.

ئەمەش بزانە: ڕۆژنامەی حوریەتی تورکی ئاماژەی بەوەداوە، ئەم هەوڵانەی تورکیا، دوای ئەوە دێن لە کۆتایی ساڵی ڕابردووەوە ئاڵۆزیی ناوخۆیی لە ئێران دروست بوو،  دەسەڵاتدارانی تاران، ئەمریکا و ئیسرائیل بە هاندانی خۆپیشاندەران تۆمەتبار دەکەن و تورکیاش هەوڵدەدات پرشکی ئاگرەکە ئەنقەرە و ناوچەکە نەگرێتەوە.