لەنێو یاریگایەكی تۆپی پێ لە مەكسیك تەقەكەرێك 11 كەس دەکوژێت

ئاڤا نیوز

لە یاریگایەکی تۆپی پێ لە مەکسیک، شەڕ و ئاڵۆزی دروست دەبێت و بەو هۆیەشەوە 11 کەس گیان لە دەست دەدەن و پۆلیسی سالامانکا لەسەر ئەو ڕووداوە سێ کەس دەستگیر دەکات.

چیرۆکی سەرەکی: دوا نیوەڕۆیەکی ئاسایی، لە شاری سالامانکا، یارییەکی خوار ئاستی پیشەگەریی ئەنجامدەدرێت و خەڵکی ناوچەکەش بۆ چێژ بینین دێنە یاریگاکە و تەماشا یارییەکە دەکەن، بەڵام لەناکاو کەسێک پەیدا دەبێت و هێرش دەکاتە سەر ئامادەبووانی نێو یاریگاکە، دەستبەجێ 11 کەس دەکوژێت و 12 کەسی دیکەش بە سەختی بریندار دەکات.

لێدوانی فەرمی: پۆلیسی شاری سالامانکای مەکسیک، لە کۆنگرەیەکی رۆژنامەوانیدا ڕایانگەیاند: سێ کەس دەستگیرکراون کە گومانیان لێدەکرێت دەستیان هەبووبێت لە هێرشە چەکدارییەکەی سەر یاریگاکە.

بە گوتەی پۆلیس: "لێکۆڵینەوەکان بەردەوام دەبێت و لە داهاتوودا زانیاریی زیاتر لەسەر هێرشەکە بڵاودەکرێتەوە."

ڕاگەیێنراوی فەرمی: سکرتارییەتی ئاسایشی گواناخواتۆ، لە ڕاگەیێنراوێكدا ئاشكرای كرد، دەستگیرکردنی ئەو سێ کەسە "لە ئەنجامی چەندین ئۆپەراسیۆنی هاوبەش و دیاریکراو بووە."

ئاسایشی گواناخواتۆ، هەرچەندە دەستگیرکرنی سێ کەسی ڕاگەیاندووە، بەڵام ناسنامەی دەستگیرکراوەکان و ئەو تۆمەتانەی ئاڕاستەیان کراوە ئاشکرای ناکات.

چی ڕوویدا: بەشێک لە شایەتحاڵەکان کە لە نێو یاریگە و دەوروبەری یاریگاکە بوون دەڵێن: "یارییەکە زۆر بە ئاسایی بەڕێوەدەچوو، بەڵام تەقەکردنەکە زۆر لە ناکاو ڕوویدا و هۆکارەکەی نازانین چیە."

زانیاریی زیاتر: میدیاکانی مەکسیک، گومان لەوە دەکەن کە تاوانبارەکە ئەندامی گرووپی "کارتێلی سانتا دێ لا ڕۆسا" بێت، کە ئەو گرووپە یەکێکە لە بەهێزترین باندە مافیاکانی ناوچەی گوادالاخارا و دەوروبەری ئەو شارەی مەکسیک، بەڵام تا ئێستا هیچ کەس و لایەنێک ئەمەی پشتڕاست نەکردووەتەوە.