ڕاگەیێنراوێک لە گرووپی میدیایی ئاڤا

ئاڤا نیوز

گرووپی میدیایی ئاڤا بە تووندی ئیدانەی هەڕەشە و هێرشی ناڕەوای هەندێک لە لایەنە فەرمی و میدیا و میدیاکارە سوورییەکان دەکات کە ڕەفتاری ڕەگەزپەرستانە و شۆڤێنی دژ بە ئەستێرەی خۆشەویست و کچە کورد سوورەیا هەساری دەکەن. 

ئێمە و خەڵکی کوردستان باش تێدەگەین ئەم هەڕەشە و هوتافانە چین و بۆچی دەکرێن، هەر بۆیە بەجددی وەریان دەگرین.

لە سەرەتای هێرشەکان بۆ سەر کورد لە ڕۆژئاوای کوردستان، سوورەیا هەساری هەم وەک میدیاکار، هەم وەک کورد و وەک کچی ڕۆژئاوای کوردستان، دەنگی زوڵاڵ و پڕ ورەی کورد بوو کە ئێستا خۆشەویسترین و کاریگەرترین میدیاکارە بەتایبەتی لەم دۆخەی ئێستا بە سەر کورددا هاتووە.

بەسوپاسەوە ئیدارەی ناوخۆی ڕۆژئاوای کوردستان ئاگاداریان کردینەوە هەڕەشەکان بەجددی وەربگرین و سوورەیا بگەڕێنینەوە، هەرچەندە ئەمە خۆی بڕیارێکی سەختە بۆ ئێمە.

دووپاتی دەکەینەوە ئەمە مانای ئەوە نییە ڕووماڵی ئاڤا میدیا و سوورەیا هەساری بۆ دۆخی ڕؤژئاوای کوردستان دەوەستێت، بەڵکو زیاتر سوور دەبین لەسەر گەیاندنی دەنگی کورد لە هەر چوار پارچەی کوردستان.

 

گرووپی میدیایی ئاڤا   

29-01-2026