ژیریی دەستکرد لە کاتی خەودا 130 نەخۆشی ئاشکرا دەکات

ئاڤا نیوز

ژیرییەکی دەستکردی نوێ لەرێگەی تەنها یەک شەو مانەوە لە تاقیگەی خەودا، دەتوانێت پێشبینیی مەترسیی تووشبوون بە 130 نەخۆشیی جیاواز بکات ساڵانێک پێش دەرکەوتنی یەکەمین نیشانەکانی.

لێدوانی فەرمی: جەیمس زو، زانای داتا لە زانکۆی ستانفۆرد و یەکێک لە نووسەرانی لێکۆڵینەوەکە ڕایگەیاند: "ئەم پێشبینییانە ساڵانێک پێش دەرکەوتنی یەکەمین نیشانەکانی نەخۆشی ڕوو دەدەن؛ خەو پەنجەرەیەکی نوێیە بەڕووی تەندروستیی مرۆڤدا کە تاوەکو ئێستا بایەخی پێنەدرابوو، بەڵام لەرێگەی ژیریی دەستکردەوە دەتوانین سوودی لێ ببینین بۆ پاراستنی ژیانی مرۆڤەکان لە مەودایەکی درێژخایەندا."

زانیاریی زیاتر: مۆدێلە نوێیەکە بە ناوی SleepFM ناسێنراوە و لەرێگەی شیکردنەوەی 585,000 کاتژمێر داتای خەوی 65,000 کەس مەشق و ڕاهێنانی پێ کراوە تاوەکو فێری زمان و کۆدی نێوان شەپۆلەکانی مێشک و چالاکیی دڵ و هەناسەدان ببێت لە کاتی خەوتنی سروشتییدا.

٠ توێژەران داتاکانی خەویان بە تۆمارە تەندروستییەکانی 25 ساڵی ڕابردووی نەخۆشەکانەوە بەستووەتەوە تاوەکو بزانن چۆن نیشانە کورتخایەنەکانی ناو خەو دەبنە نەخۆشیی داهاتوو. سیستەمەکە بە وردییەکی زۆر دەتوانێت مەترسیی تووشبوون بە نەخۆشییەکانی وەک بارکنسۆن، لەبیرچوونەوە (دێمێنسیا)، جەڵتەی دڵ، شێرپەنجەی پڕۆستات و شێرپەنجەی مەمک دەستنیشان بکات. ئەم تەکنەلۆژیایە نیشانیداوە کە دەتوانێت کێبرکێی وردترین ئامێرە پزیشکییەکانی ئێستا بکات و لە چەندین بواری جیاوازدا سەرکەوتنی گەورە بەدەستبهێنێت.

ئەوەی پێویستە بیزانیت: ئەم لێکۆڵینەوەیە لە گۆڤاری Nature Medicine بڵاوکراوەتەوە و لەلایەن تیمێکی پسپۆڕی زانکۆی ستانفۆردەوە سەرپەرشتیی کراوە. پێشتر تاقیگەکانی خەو تەنها بۆ دەستنیشانکردنی کێشەکانی وەک پرخە یان پچڕانی هەناسە بەکاردەهاتن، بەڵام ئێستا گۆڕدراون بۆ ناوەندی سەرەکیی پێشبینیکردنی تەندروستیی درێژخایەنی مرۆڤ و ڕێگریکردن لە نەخۆشییە درێژخایەنەکان پێش سەرهەڵدانیان.