سۆمۆ: مانگی ڕابردوو نزیكەی شەش ملیۆن بەرمیل نەوتی كوردستان هەناردە كراوە

ئاڤا نیوز

كۆمپانیای سۆمۆ ڕایدەگەیێنێت، لە كۆی زیاتر لە 107 ملیۆن بەرمیل نەوت كە لە مانگی 12ـی ساڵی ڕابردوو هەناردەكراوە، زیاتر لە پێنج ملیۆن و 997 هەزار بەرمیل نەوتی هەرێمی كوردستان بووە.

چیرۆکی سەرەکی: هاوشێوەی مانگەكانی ڕابردوو، كۆمپانیای هەناردەكردن و بەبازاڕكردنی نەوتی عێراق 'سۆمۆ' داتای مانگانەی كۆی نەوتی خاوی هەناردەكراو و بڕی داهاتەكەی بڵاوكردووەتەوە و ئاشكرای دەكات لە مانگی كانوونی یەكەمی 2025ـدا، كۆی نەوتی خاوی هەناردەكراوی عێراق گەیشتووەتە 107 ملیۆن و 651 هەزار و 61 بەرمیل.

كۆمپانیای سۆمۆ داهاتی نەوتی هەناردەكراوی مانگی ڕابردووی بڵاوكردووەتەوە كە بڕەكەی شەش ملیار و 388 ملیۆن و 429 هەزار و 610 دۆلار بووە.

ژمارەکان وا دەڵێن: لە كۆی بڕی نەوتی هەناردەكراوی مانگی ڕابردوو، زیاتر لە 100 ملیۆن و 450 هەزار بەرمیل نەوت هی كێڵگەكانی بەسرە بووە،  پێنج ملیۆن و 997 هەزار و 527 بەرمیل، نەوتی هەرێمی كوردستان بووە كە لەڕێگەی بەندەری جەیهانەوە هەناردە كراوە، هەروەها لە كێڵگەی گەیارە بڕی 923 هەزار و 774 بەرمیل هەناردە کراوە، لە كەركووكیش؛ بڕی 309 هەزار 712 بەرمیل نەوت بۆ وڵاتی ئوردن هەناردە کراوە.

باکگراوند: لە 25ـی ئەیلوولی 2025ـەوە هەناردەكردنی نەوتی كوردستان لەڕێگەی سۆمۆوە دەستیپێکردووەتەوە، پێشتر عەلی نزار شەتری، بەڕێوەبەری گشتیی سۆمۆ بە ئاژانسی فەرمی عێراقی ڕاگەیاندبوو، لە ماوەی سێ مانگی کۆتایی ساڵی 2025ـدا، بڕی 19 ملیۆن بەرمیل نەوتی هەرێمی کوردستان لە ڕێگەی ئەوانەوە هەناردەی بازاڕەکانی جیهان کراوە، داهاتی مانگانەی نەوتی کوردستان نزیكەی 400 ملیۆن دۆلارە.