جارێکی دیکە  بەهای دیناری عێراقی بەرامبەر دۆلار دابەزی

ئاڤا نیوز

 

ئەگەرچی بەیانیی ئەمڕۆ یەکشەممە بەهای دینار بەرامبەر دۆلار بەراورد بە دوێنێ جێگیر بوو، بەڵام دوای نیوەڕۆی ئەمڕۆ هەر 100 دۆلارێک هەزار دینار چووە سەر بەهاکەی.

 

هۆکارە زانراوەکان: شارەزایانی بواری ئابووری هۆکاری دابەزینی بەهای دیناری عێراقی بۆ بڵاوبوونەوەی ئەو دەنگۆیە دەگەڕێتەوە ئەمریکا بەهۆی گرووپە چەکدارەکانەوە بە نیازە سزای نوێ بەسەر عێراق بسەپێنێت.

 

شارەزایانی ئابووری دابەزینی بەهای دیناری عێراقی بۆ ئەم چەند هۆکارێکی دیکەش دەگەڕێننەوە؛

-مەترسییەکانی سەپاندنی سزای ئەمریکا بەسەر عێراق، ئەم دەنگۆیە لە شەقامی عێراق بەربڵاوە.

-ڕووداوەکانی سووریا و پەڕینەوەی بۆ عێراق، وای کردووە خواست لەسەر دۆلار زیاد ببێت.

-بەرزبوونەوەی نرخی زێڕ چاوەڕوانکراوە، بەتایبەت دوای کۆبوونەوەی ئەنجوومەنی یەدەگی فیدراڵیی ئەمریکا لە 28ی ئەم مانگە.

-پێشبینی دەکرێت جارێکی دیکە ڕێژەی سوو دابەزێت، ئەمەش کاریگەری لەسەر بەرزبوونەوەی نرخی زێڕ دەبێت.

لێدوانی فەرمی: کەیفی خۆشناو، وتەبێژی بازاڕی دۆلارەکەی هەولێر بە ئاڤا میدیای ڕاگەیاند، دوای نیوەڕۆی ئەمڕۆ لە هەولێر 100 دۆلار بەرامبەر 149 هەزار و 100 دینار بوو، بەڵام لە سلێمانی 100 دۆلار بەرامبەر 149 هەزار 300 دینارە.