سەدان مووچەخۆر داوای گواستنەوەی هەژمارەکانیان لە بانکی تی بی ئای دەکەن

ئاڤا نیوز

بەهۆی کەمتەرخەمی و خراپیی خزمەتگوزارییەوە، سەدان مووچەخۆری 'هەژماری من' کە لەڕێگەی بانکی (TBI)ـەوە مووچەکانیان وەردەگرن، واژۆیان کۆکردووەتەوە و داواکارییان پێشکەشکردووە بۆ گواستنەوەی هەژمارەکانیان بۆ بانکێکی دیکە.

چیرۆکی سەرەکی: بانکی تی بی ئای (TBI)، یەکێکە لە بانکەکانی نێو پڕۆژەی 'هەژماری من'، بەڵام بەهۆی ئەوەی نەیتوانیووە خزمەتگوزاریی شایستە پێشکەش بە مووچەخۆران بکات، بەردەوامیش کێشەی لە سیستمەکەیدا هەبووە، بەم دوایە، نزیکەی هەزار فەرمانبەر ڕووبەڕووی کێشەی جیاواز بوونەوە، ئەمەش وایکردووە مووچەخۆران داوای گواستنەوەی ڕاژەکانیان بکەن.

لێدوانی فەرمی: سەرچاوەیەک لە پڕۆژەی 'هەژماری من'، بە ئاڤای گوت، "چوار فەرمانگە لە چوار شوێنی جیاواز بە واژۆی مووچەخۆرانیەوە داوایان کردووە، هەژماری بانکەکانیان بگوازنەوە، ئێمەش کار لەسەر گواستنەوەی هەژمارە بانکییەکانیان دەکەین، دوای ئەوەی کە وردبینی لە داواکارییەکانیان کرا."

سەبارەت بەوەی ئایا تاوەکو مامەڵەی گواستنەوەی بانکیان بۆ دەکرێت، چارەنووسی مووچەکانیان چی بەسەردێت، ئەو سەرچاوەی 'هەژماری من' وتی: "تاوەکو مووچەکەیان دەگوزارێتەوە لە ڕێگەی بانکی (TBI) مووچەکانیان ڕابکێشن، هیچ مووچەیەکیان نافەوتێت بەهۆی ئەو مامەڵەیەوە."

زانیاریی زیاتر: هەشت بانک لە 'هەژماری من' بەشدارن، تەنها تی بی ئای (TBI) حکومییە و سەر بە حکومەتی عێراقە، تاکە بانکە ئەو هەموو کێشەیەی هەیە و بەشدارەکانی بەردەوام سکاڵایان هەیە، نزیکەی 30 هەزار فەرمانبەری گشتی لە هەرێمی کوردستان لە ڕێگەی ئەم بانکەوە مووچە وەردەگرن، زۆربەیان لە سلێمانین.