سوپای سووریا هێزێکی زۆری لە دەوروبەری حەسەکە کۆکردووەتەوە

ئاڤا نیوز

مەترسی هەڵگیرسانی شەڕێکی سەخت لە حەسەکە زیادی کردووە و سوپای عەرەبی سووریا هێزێکی زۆر و چەکی قورسی لە دەوروبەری شارەکە کۆکردووەتەوە؛ هاوکات بەهۆی مەترسی هێرشەکانەوە، هەزاران خێزان بەرەو قامشلۆ ئاوارە بوون و لە دۆخێکی مرۆیی خراپدا دەژین.

چیرۆکی سەرەکی: هەرچەندە حەسەکە لەژێر دەستی هەسەدە دایە، بەڵام کۆکردنەوەی هەزاران سەربازی سوپای عەرەبی سووریا و گرووپە چەکدارەکان لە سنوورەکانی شارەکە، گومانی لای هەسەدە دروستکردووە کە دەیانەوێت ئاگربەست بۆ هێرشێکی کتوپڕ بقۆزنەوە، لە بەرامبەردا، هەسەدە هێزێکی زۆری ناردووەتە هێڵەکانی پێشەوە و خەریکی لێدانی خەندەق و قایمکردنی سەنگەرەکانە.

لێدوانی فەرمی: مەزڵووم عەبدی، فەرماندەی گشتیی هەسەدە لەسەر هەڵوێستی خۆیان سوورە و ڕایگەیاندووە: "ئێمە لەگەڵ بەردەوامیی ئاگربەستین و نامانەوێت شەڕ دەست پێبکاتەوە، بەڵام ئەگەر هێرش بکرێت، شەڕی مان و نەمان دەکەین."

زانیاریی پەیامنێر: ڕۆکان جاف، نێردراوی ئاڤا لە حەسەکە ڕایگەیاندووە، هێڵەکانی بەرگری تەنیا چەند کیلۆمەترێک لە سەنتەری شارەوە دوورن و مەودای نێوان هەسەدە و سوپای عەرەبی سووریا تەنیا دوو کیلۆمەترە.

زانیاریی زیاتر: لە ڕووی مرۆییەوە، ئاوارەکان ڕوویان لە قامشلۆ کردووە و بەشێکی زۆریان لە مزگەوت، قوتابخانە و تەنانەت ناو ئۆتۆمبێلەکانیاندا دەخەون. ئەگەرچی لە ناوەندی قامشلۆ دەزگای خێرخوازیی بارزانی هاوکارییان دەکات، بەڵام ئاوارەکانی دەرەوەی سەنتەری شار لە دۆخێکی ئێجگار خراپدان و نە خواردن و نە گەرمکەرەوەیان لایە.

لە شاری قامیشلۆ کە نزیکەی 100  کیلۆمەتر لە حەسەکە دوورە، ڕەوشەکە تا حەدێک ئارامە و شەڕ لەوێ 10 بۆ 20 کیلۆمەتر دوورە، هەزاران ئاوارەش ڕوویان تێکردووە.